izhaar-e-mohabbat

tum itne hasīñ ho tum aise hasīñ ho

haqīqat meñ tum to surayyā jabīñ ho

maiñ kah duuñ agar kuchh tumheñ bhī yaqīñ ho

tumheñ pyaar karne ko jī chāhtā hai

laboñ par hañsī hai gulābī gulābī

nigāhoñ kī jumbish sharābī sharābī

tumhārā chehra kitābī kitābī

tumheñ pyaar karne ko jī chāhtā hai

tumhārī nigāheñ payām-e-mohabbat

ḳhamoshī tumhārī kalām-e-mohabbat

salāmat tumhīñ se hai nām-e-mohabbat

tumheñ pyaar karne ko jī chāhtā hai

tumhārā tajammul qayāmat qayāmat

tumhāre ishāre mohabbat mohabbat

tumheñ pyaar karne ko jī chāhtā hai

tumhārā sarāpā hai mahshar-ba-dāmāñ

mujassam ho ġhārat-gar-e-dīn-o-īmāñ

na pūchho mire dil kī hasrat mirī jaañ

tumheñ pyaar karne ko jī chāhtā hai

tumhārā tabassum guloñ kī javānī

tumhārā tarannum mai-e-arġhavānī

tumhārā takallum kitāb-e-ma.ānī

tumheñ pyaar karne ko jī chāhtā hai

tumhārī nazar kaif-o-mastī liye hai

sharāb-e-mohabbat ke sāġhar piye hai

ye 'afzal' kā dil bhī irāda kiye hai

tumheñ pyaar karne ko jī chāhtā hai

tum itne hasin ho tum aise hasin ho

haqiqat mein tum to surayya jabin ho

main kah dun agar kuchh tumhein bhi yaqin ho

tumhein pyar karne ko ji chahta hai

labon par hansi hai gulabi gulabi

nigahon ki jumbish sharabi sharabi

tumhaara chehra kitabi kitabi

tumhein pyar karne ko ji chahta hai

tumhaari nigahen payam-e-mohabbat

KHamoshi tumhaari kalam-e-mohabbat

salamat tumhin se hai nam-e-mohabbat

tumhein pyar karne ko ji chahta hai

tumhaara tajammul qayamat qayamat

tumhaare ishaare mohabbat mohabbat

tumhein pyar karne ko ji chahta hai

tumhaara sarapa hai mahshar-ba-daman

mujassam ho ghaarat-gar-e-din-o-iman

na puchho mere dil ki hasrat meri jaan

tumhein pyar karne ko ji chahta hai

tumhaara tabassum gulon ki jawani

tumhaara tarannum mai-e-arghawani

tumhaara takallum kitab-e-maani

tumhein pyar karne ko ji chahta hai

tumhaari nazar kaif-o-masti liye hai

sharab-e-mohabbat ke saghar piye hai

ye 'afzal' ka dil bhi irada kiye hai

tumhein pyar karne ko ji chahta hai