izhaar

kaise maiñ bhī bhuul jā.ūñ

zindagī se apnā rabt-e-avvalīñ

ek duur uftāda qarye ke qarīb

ik junūñ afroz shaam

nahr par shīsham ke ashjār-e-buland

chāñdnī meñ in kī shāḳhoñ ke tale

tere paimān-e-mohabbat kā vo iz.hār-e-tavīl

ruuh kā iz.hār the bose mire

jaise merī shā.irī merā amal

ruuh kā iz.hār kaise bhuul jā.ūñ

kaise kar Dālūñ maiñ jism-o-rūh ko

aaj be-āhañg-o-nūr

tū ki thī us vaqt gum-nāmī ke ġhāroñ meñ nihāñ

mere hoñToñ hī ne dī tujh ko najāt

apnī rāhoñ par uThā laayā tujhe

zinda-e-jāved kar Daalā tujhe

jaise koī but-tarāsh

apne but ko zindagī ke nuur se tābāñ kare

is ko barg-o-bār dene ke liye

apne jism-o-rūh ko uryāñ kare

mere bose ruuh kā iz.hār the

ruuh jo iz.hār hī se zinda-o-tābinda hai

hai isī iz.hār se hāsil mujhe qurb-e-hayāt

ruuh kā iz.hār kaise bhuul jā.ūñ

kaise main bhi bhul jaun

zindagi se apna rabt-e-awwalin

ek dur uftada qarye ke qarib

ek junun afroz sham

nahr par shisham ke ashjar-e-buland

chandni mein in ki shaKHon ke tale

tere paiman-e-mohabbat ka wo izhaar-e-tawil

ruh ka izhaar the bose mere

jaise meri shairi mera amal

ruh ka izhaar kaise bhul jaun

kaise kar Dalun main jism-o-ruh ko

aaj be-ahang-o-nur

tu ki thi us waqt gum-nami ke ghaaron mein nihan

mere honTon hi ne di tujh ko najat

apni rahon par uTha laya tujhe

zinda-e-jawed kar Dala tujhe

jaise koi but-tarash

apne but ko zindagi ke nur se taban kare

is ko barg-o-bar dene ke liye

apne jism-o-ruh ko uryan kare

mere bose ruh ka izhaar the

ruh jo izhaar hi se zinda-o-tabinda hai

hai isi izhaar se hasil mujhe qurb-e-hayat

ruh ka izhaar kaise bhul jaun