izhaar

tujhe iz.hār-e-mohabbat se agar nafrat hai

tū ne hoñToñ ko larazne se to rokā hotā

be-niyāzī se magar kāñptī āvāz ke saath

tū ne ghabrā ke mirā naam na pūchhā hotā

tere bas meñ thī agar mash.al-e-jazbāt kī lau

tere ruḳhsār meñ gulzār na bhaḌkā hotā

yuuñ to mujh se huiiñ sirf āb-o-havā kī bāteñ

apne TuuTe hue fiqroñ ko to parkhā hotā

yūñhī be-vaj.h ThiTakne kī zarūrat kyā thī

dam-e-ruḳhsat maiñ agar yaad na aayā hotā

terā ġhammāz banā ḳhud tirā andāz-e-ḳhirām

dil na sambhlā thā to qadmoñ ko sambhālā hotā

apne badle mirī tasvīr nazar aa jaatī

tū ne us vaqt agar aa.ina dekhā hotā

hausla tujh ko na thā mujh se judā hone kā

varna kājal tirī āñkhoñ meñ na phailā hotā

tujhe izhaar-e-mohabbat se agar nafrat hai

tu ne honTon ko larazne se to roka hota

be-niyazi se magar kanpti aawaz ke sath

tu ne ghabra ke mera nam na puchha hota

tere bas mein thi agar mashal-e-jazbaat ki lau

tere ruKHsar mein gulzar na bhaDka hota

yun to mujh se huin sirf aab-o-hawa ki baaten

apne TuTe hue fiqron ko to parkha hota

yunhi be-wajh ThiTakne ki zarurat kya thi

dam-e-ruKHsat main agar yaad na aaya hota

tera ghammaz bana KHud tera andaz-e-KHiram

dil na sambhla tha to qadmon ko sambhaala hota

apne badle meri taswir nazar aa jati

tu ne us waqt agar aaina dekha hota

hausla tujh ko na tha mujh se juda hone ka

warna kajal teri aankhon mein na phaila hota