jagir

phir usī vādi-e-shādāb meñ lauT aayā huuñ

jis meñ pinhāñ mire ḳhvāboñ kī tarab-gāheñ haiñ

mere ahbāb ke sāmān-e-ta.ayyush ke liye

shoḳh siine haiñ javāñ jism hasīñ bāñheñ haiñ

sabz khetoñ meñ ye dubkī huī doshīzā.eñ

in kī shiryānoñ meñ kis kis kā lahū jaarī hai

kis meñ jur.at hai ki is raaz kī tash.hīr kare

sab ke lab par mirī haibat kā fusūñ taarī hai

haa.e vo garm o dil-āvez ubalte siine

jin se ham satvat-e-ābā kā sila lete haiñ

jaane un marmarīñ jismoñ ko ye mariyal dahqāñ

kaise in tiira gharoñdoñ meñ janam dete haiñ

ye lahakte hue paude ye damakte hue khet

pahle ajdād kī jāgīr the ab mere haiñ

ye charā-gāh ye revaḌ ye maveshī ye kisān

sab ke sab mere haiñ sab mere haiñ sab mere haiñ

in kī mehnat bhī mirī hāsil-e-mehnat bhī mirā

in ke baazū bhī mire quvvat-e-bāzū bhī mirī

maiñ ḳhudāvand huuñ us vus.at-e-be-pāyāñ kā

mauj-e-āriz bhī mirī nik.hat-e-gesū bhī mirī

maiñ un ajdād kā beTā huuñ jinhoñ ne paiham

ajnabī qaum ke saa.e kī himāyat kī hai

uzr kī sā.at-e-nāpāk se le kar ab tak

har kaḌe vaqt meñ sarkār kī ḳhidmat kī hai

ḳhaak par reñgne vaale ye fasurda Dhāñche

in kī nazreñ kabhī talvār banī haiñ na banīñ

in kī ġhairat pe har ik haath jhapaT saktā hai

in ke abrū kī kamāneñ na tanī haiñ na tanīñ

haa.e ye shaam ye jharne ye shafaq kī laalī

maiñ in āsūda fazāoñ meñ zarā jhuum na luuñ

vo dabe paañv idhar kaun chalī jaatī hai

baḌh ke us shoḳh ke tarshe hue lab chuum na luuñ

phir usi wadi-e-shadab mein lauT aaya hun

jis mein pinhan mere KHwabon ki tarab-gahen hain

mere ahbab ke saman-e-tayyush ke liye

shoKH sine hain jawan jism hasin banhen hain

sabz kheton mein ye dubki hui doshizaen

in ki shiryanon mein kis kis ka lahu jari hai

kis mein jurat hai ki is raaz ki tashhir kare

sab ke lab par meri haibat ka fusun tari hai

hae wo garm o dil-awez ubalte sine

jin se hum satwat-e-aba ka sila lete hain

jaane un marmarin jismon ko ye mariyal dahqan

kaise in tera gharondon mein janam dete hain

ye lahakte hue paude ye damakte hue khet

pahle ajdad ki jagir the ab mere hain

ye chara-gah ye rewaD ye maweshi ye kisan

sab ke sab mere hain sab mere hain sab mere hain

in ki mehnat bhi meri hasil-e-mehnat bhi mera

in ke bazu bhi mere quwwat-e-bazu bhi meri

main KHudawand hun us wusat-e-be-payan ka

mauj-e-ariz bhi meri nikhat-e-gesu bhi meri

main un ajdad ka beTa hun jinhon ne paiham

ajnabi qaum ke sae ki himayat ki hai

uzr ki saat-e-napak se le kar ab tak

har kaDe waqt mein sarkar ki KHidmat ki hai

KHak par rengne wale ye fasurda Dhanche

in ki nazren kabhi talwar bani hain na banin

in ki ghairat pe har ek hath jhapaT sakta hai

in ke abru ki kamanen na tani hain na tanin

hae ye sham ye jharne ye shafaq ki lali

main in aasuda fazaon mein zara jhum na lun

wo dabe panw idhar kaun chali jati hai

baDh ke us shoKH ke tarshe hue lab chum na lun