jagti aankhon ke KHwab

maiñ kyā likkhūñ

tumhāre vāste

ai nīm-jān-o-soḳhta-tan

vādī-e-qatl-e-amāñ ke bāsiyo

maiñ kyā likkhūñ

koī nauha tumhāre rū-ba-rū

sharminda-e-tāsīr na hogā

koī harf-e-hikāyat

sabr kī tasvīr na hogā

yahī to jāgtī āñkhoñ se tum ne ḳhvāb dekhe the

ki is banjar zamīñ par apne ḳhuuñ kī fasl Tāñkoge

har ik manzar meñ amn-o-āshtī ke rang phailā kar

har ik chehre ko nūr-e-itmīnān-e-qalb bāñToge

isī banjar zamīñ pe ḳhāk-o-ḳhūñ meñ aaj ġhaltāñ ho

to phir kyoñ sar-burīda shāḳh kī mānind be-jāñ ho

ye honā thā to kyoñ phir is ke ho jaane pe hairāñ ho

mire logo

tumhārī band āñkheñ

jāgtī āñkhoñ ke ḳhvāboñ kī

tumheñ ta.abīr detī haiñ

isī banjar zamīñ meñ

qabr kī jāgīr detī haiñ

main kya likkhun

tumhaare waste

ai nim-jaan-o-soKHta-tan

wadi-e-qatl-e-aman ke basiyo

main kya likkhun

koi nauha tumhaare ru-ba-ru

sharminda-e-tasir na hoga

koi harf-e-hikayat

sabr ki taswir na hoga

yahi to jagti aankhon se tum ne KHwab dekhe the

ki is banjar zamin par apne KHun ki fasl Tankoge

har ek manzar mein amn-o-ashti ke rang phaila kar

har ek chehre ko nur-e-itminan-e-qalb banToge

isi banjar zamin pe KHak-o-KHun mein aaj ghaltan ho

to phir kyon sar-burida shaKH ki manind be-jaan ho

ye hona tha to kyon phir is ke ho jaane pe hairan ho

mere logo

tumhaari band aankhen

jagti aankhon ke KHwabon ki

tumhein tabir deti hain

isi banjar zamin mein

qabr ki jagir deti hain