jam-e-jam ke sath

kaaTī hai umr abrū-e-teġh-e-do-dam ke saath

maiñ us ke dam ke saath huuñ vo mere dam ke saath

dasht-e-junūñ simaT ke kaf-e-pā se jā milā

manzil lipaT ke rah ga.ī naqsh-e-qadam ke saath

āvāra-gardī fāqa-kashī fikr-e-rozgār

ye sab balā.eñ lipTī haiñ āshiq ke dam ke saath

afyūñ kā daur bhī hai mai-e-arġhavāñ ke baad

jām-e-sifāl haath meñ hai jām-e-jam ke saath

ai shaiḳh tauba rum nahīñ hogī kabhī harām

maujūd ram hai dekh haram aur iram ke saath

Duubā huā huuñ ḳhāl-e-dahan kī research meñ

Takrā rahā huuñ sāhil-e-bahr-e-adam ke saath

ek Queue hai āsmāñ se zamīñ tak lagā huā

ġham ġham ke baad aur alam hai alam ke saath

aise salām ko hai mirā duur se salām

hotā hai jo salām ka.ī pech-o-ḳham ke saath

kal tak bhī baat karne kā jin ko na thā shu.ūr

vo ham se baat karne lage aaj ham ke saath

itnā ḳhamīda ho gayā piirī ke haath se

kartā huuñ ik salām bhī sau pech-o-ḳham ke saath

kaTi hai umr abru-e-tegh-e-do-dam ke sath

main us ke dam ke sath hun wo mere dam ke sath

dasht-e-junun simaT ke kaf-e-pa se ja mila

manzil lipaT ke rah gai naqsh-e-qadam ke sath

aawara-gardi faqa-kashi fikr-e-rozgar

ye sab balaen lipTi hain aashiq ke dam ke sath

afyun ka daur bhi hai mai-e-arghawan ke baad

jam-e-sifal hath mein hai jam-e-jam ke sath

ai shaiKH tauba rum nahin hogi kabhi haram

maujud ram hai dekh haram aur iram ke sath

Duba hua hun KHal-e-dahan ki research mein

Takra raha hun sahil-e-bahr-e-adam ke sath

ek Queue hai aasman se zamin tak laga hua

gham gham ke baad aur alam hai alam ke sath

aise salam ko hai mera dur se salam

hota hai jo salam kai pech-o-KHam ke sath

kal tak bhi baat karne ka jin ko na tha shuur

wo hum se baat karne lage aaj hum ke sath

itna KHamida ho gaya piri ke hath se

karta hun ek salam bhi sau pech-o-KHam ke sath