jaane kya sach hai yahan

jaane kyā sach hai yahāñ

kahkashāoñ kā ye jaadū ki guzar-gāh-e-ḳhayāl

koī taarā

ki darīche meñ chamaktā huā chāñd

yā mire surḳh papoToñ pe rakhe ḳhvāb kī vahshat kā ġhubār

yā kisī jism ko chhū lene kī ḳhvāhish meñ bhaTaktī huī aañkh

yā rag-o-pai meñ sulagtī huī lazzat kā ḳhumār

koī inkār ki iqrār

jaane kyā sach hai yahāñ

shām-e-afsos kā Duubā huā sūraj yā koī sub.h-e-visāl

kahkashāoñ kā ye jaadū ki guzar-gāh-e-ḳhayāl

koī paiġhām-e-mohabbat ye siyāsat yā kisī halqa-e-zanjīr meñ jism

raah meñ jhukte hue sar yā kisī shaah ke maġhrūr qadam

yā kisī mauj meñ aa.e hue majzūb kā rauñdā huā taaj

laḌkhaḌāte hue palḌoñ meñ ye insāf kī bhiik

ye mo.arriḳh kī lahū chāTtī miTTī kā bayāñ

jaane kyā sach hai yahāñ

apne hone kī haqīqat yā kisī qabr meñ gaaḌe hue katbe kī darāḌ

ye ḳhudā yā kisī dargāh pe rakkhe hue aañsū kī tapish

merā īmāñ ki sanam-ḳhāna-e-tanhā.ī meñ

us but-e-kāfir kī kashish

apne marne kī tamanna hai ki jiine kī ḳhalish

ai guzar-gāh-e-ḳhayāl

ab kisī roz to khul jaa.e ye uqda āḳhir

ġhaar ke muñh se haTā.e koī patthar aa kar

ḳhaak meñ uḌte mah-o-sāl kā asrār khule

vo jo dīvār ke us paar hai is paar khule

jaane kya sach hai yahan

kahkashaon ka ye jadu ki guzar-gah-e-KHayal

koi tara

ki dariche mein chamakta hua chand

ya mere surKH papoTon pe rakhe KHwab ki wahshat ka ghubar

ya kisi jism ko chhu lene ki KHwahish mein bhaTakti hui aankh

ya rag-o-pai mein sulagti hui lazzat ka KHumar

koi inkar ki iqrar

jaane kya sach hai yahan

sham-e-afsos ka Duba hua suraj ya koi subh-e-visal

kahkashaon ka ye jadu ki guzar-gah-e-KHayal

koi paigham-e-mohabbat ye siyasat ya kisi halqa-e-zanjir mein jism

rah mein jhukte hue sar ya kisi shah ke maghrur qadam

ya kisi mauj mein aae hue majzub ka raunda hua taj

laDkhaDate hue palDon mein ye insaf ki bhik

ye moarriKH ki lahu chaTti miTTi ka bayan

jaane kya sach hai yahan

apne hone ki haqiqat ya kisi qabr mein gaDe hue katbe ki daraD

ye KHuda ya kisi dargah pe rakkhe hue aansu ki tapish

mera iman ki sanam-KHana-e-tanhai mein

us but-e-kafir ki kashish

apne marne ki tamanna hai ki jine ki KHalish

ai guzar-gah-e-KHayal

ab kisi roz to khul jae ye uqda aaKHir

ghaar ke munh se haTae koi patthar aa kar

KHak mein uDte mah-o-sal ka asrar khule

wo jo diwar ke us par hai is par khule