jarub-kash

āsmānoñ ke tale sabz-o-ḳhunuk goshoñ meñ

koī hogā jise ik sā.at-e-rāhat mil jaa.e

ye ghaḌī tere muqaddar meñ nahīñ hai na sahī

āsmānoñ ke tale talḳh-o-siyah rāhoñ par

itne ġham bikhre paḌe haiñ ki agar tū chun le

koī ik ġham tirī qismat ko badal saktā hai

āsmānoñ ke tale talḳh-o-siyah rāhoñ par

tū agar dekhe to ḳhushiyoñ kī gurezāñ sarhad

soz-e-yak-ġham se shakeb-e-ġham-e-dīgar tak hai

zindagī qahr sahī zahr sahī kuchh bhī sahī

āsmānoñ ke tale talḳh-o-siyah lamhoñ meñ

jur.a-e-sam ke liye iffat-e-lab lāzim hai

aur tū hai ki tire jism kā saaya bhī najis

tū agar chāhe to in talḳh-o-siyah rāhoñ par

jā-ba-jā itnī taḌaptī huī duniyāoñ meñ

itne ġham bikhre paḌe haiñ ki jinheñ terī hayāt

qūt-e-yak-shab ke taqaddus meñ samo saktī hai

kaash tū hīla-e-jārūb ke par noch sake

kaash tū soch sake soch sake

aasmanon ke tale sabz-o-KHunuk goshon mein

koi hoga jise ek saat-e-rahat mil jae

ye ghaDi tere muqaddar mein nahin hai na sahi

aasmanon ke tale talKH-o-siyah rahon par

itne gham bikhre paDe hain ki agar tu chun le

koi ek gham teri qismat ko badal sakta hai

aasmanon ke tale talKH-o-siyah rahon par

tu agar dekhe to KHushiyon ki gurezan sarhad

soz-e-yak-gham se shakeb-e-gham-e-digar tak hai

zindagi qahr sahi zahr sahi kuchh bhi sahi

aasmanon ke tale talKH-o-siyah lamhon mein

jura-e-sam ke liye iffat-e-lab lazim hai

aur tu hai ki tere jism ka saya bhi najis

tu agar chahe to in talKH-o-siyah rahon par

ja-ba-ja itni taDapti hui duniyaon mein

itne gham bikhre paDe hain ki jinhen teri hayat

qut-e-yak-shab ke taqaddus mein samo sakti hai

kash tu hila-e-jarub ke par noch sake

kash tu soch sake soch sake