jab chali sard hawa

mausam-e-sarmā kī ye vīrān aur maġhmūm shaam

kohar kī chādar meñ lipTī hai sisaktī kā.enāt

giit ḳhvāboñ kī tarah larzāñ sulagtī hai hayāt

barf meñ Duubī havā kī sīTiyāñ

chiil ke jangal kī mīThī loriyāñ

Dagmagāte haiñ pareshāñ muzmahil lamhoñ ke gaam

chār-sū āvāz de kar pūchhtā phirtā huuñ maiñ

in havāoñ kī jabīn-e-nāz par

kyā kahīñ likkhā huā hai merā naam

uḌ rahe haiñ rāstoñ par zard patte jo kabhī

chand lamhoñ ko bane the zīnat-e-shāḳh-e-shajar

jaane ye kab tak raheñge yuuñ havā ke dosh par

kū-ba-kū qarya-ba-qarya yam-ba-yam mahv-e-safar

dukh ke lambe silsile aur chand lamhoñ kī ḳhushī

haa.e apnī zindagī

mausam-e-sarma ki ye viran aur maghmum sham

kohar ki chadar mein lipTi hai sisakti kaenat

git KHwabon ki tarah larzan sulagti hai hayat

barf mein Dubi hawa ki siTiyan

chil ke jangal ki miThi loriyan

Dagmagate hain pareshan muzmahil lamhon ke gam

chaar-su aawaz de kar puchhta phirta hun main

in hawaon ki jabin-e-naz par

kya kahin likkha hua hai mera nam

uD rahe hain raston par zard patte jo kabhi

chand lamhon ko bane the zinat-e-shaKH-e-shajar

jaane ye kab tak rahenge yun hawa ke dosh par

ku-ba-ku qarya-ba-qarya yam-ba-yam mahw-e-safar

dukh ke lambe silsile aur chand lamhon ki KHushi

hae apni zindagi