jab tamannaen muskuraati hain

jab tamannā.eñ muskurātī haiñ

phuul bantī haiñ aur mahaktī haiñ

koī chupke se mere siine meñ

sub.h kā nuur ghol jaatā hai

khiḌkiyāñ dil kī khol jaatā hai

sāf-shaffāf se darīchoñ meñ

raqs kartā hai māhtāb koī

dil kī gahrā.iyoñ meñ girte hī

Duub jaatā hai āftāb koī

chāñd aatā hai chāñdnī le kar

jhuk ke taare salām karte haiñ

dil ke zaḳhmoñ kā chāñd taare bhī

kis qadar ehtirām karte haiñ

koñpleñ pyaar aur mohabbat kī

pattiyāñ ban ke sarsarātī haiñ

mish.aleñ shāhrāh-e-hastī par

ġham ke hāthoñ meñ jagmagātī haiñ

mish.aleñ pyaar aur mohabbat kī

jagmagātī haiñ jhilmilātī haiñ

ḳhvāb bantā hai ik haqīqat jab

dil meñ ummīdeñ muskurātī haiñ

koī chupke se mere siine meñ

sub.h kā nuur ghol jaatā hai

khiḌkiyāñ dil kī khol jaatā hai

jab tamannaen muskuraati hain

phul banti hain aur mahakti hain

koi chupke se mere sine mein

subh ka nur ghol jata hai

khiDkiyan dil ki khol jata hai

saf-shaffaf se darichon mein

raqs karta hai mahtab koi

dil ki gahraiyon mein girte hi

Dub jata hai aaftab koi

chand aata hai chandni le kar

jhuk ke tare salam karte hain

dil ke zaKHmon ka chand tare bhi

kis qadar ehtiram karte hain

konplen pyar aur mohabbat ki

pattiyan ban ke sarsaraati hain

mishalen shahrah-e-hasti par

gham ke hathon mein jagmagati hain

mishalen pyar aur mohabbat ki

jagmagati hain jhilmilati hain

KHwab banta hai ek haqiqat jab

dil mein ummiden muskuraati hain

koi chupke se mere sine mein

subh ka nur ghol jata hai

khiDkiyan dil ki khol jata hai