jab tarsil baTan tak pahunchi

kal, tirā naama

jo miltā thā hameñ

us ke alfāz tale

muddateñ, ma.ānī kī tashrīhoñ meñ

lutf kā sail-e-ravāñ rahtā thā

rāteñ bistar pe

nasha ḳhvāb kā rakh detī thiiñ

itr meñ Duubī huī dhuup kī paimā.ish par

chāñdnī nīñd, ko lorī kī thapak detī thī

zehn meñ sub.h o masā

ik ajab farhat-e-nau-rasta safar kartī thī

lekin ab... qurbateñ haiñ baham

samā.at ko ..magar...

phone kī ghanTī ko sunñe ko tarastī ḳhvāhish

munqata rābita paane ke liye koshāñ hai

uñgliyāñ rahtī haiñ

ek ek button par raqsāñ

yahī māmūl hai muddat se

magar, telephone

ek ḳhāmosh sadā detā hai

silsila lamhoñ kā

sadiyoñ sā banā detā hai

kal, tera nama

jo milta tha hamein

us ke alfaz tale

muddaten, maani ki tashrihon mein

lutf ka sail-e-rawan rahta tha

raaten bistar pe

nasha KHwab ka rakh deti thin

itr mein Dubi hui dhup ki paimaish par

chandni nind, ko lori ki thapak deti thi

zehn mein subh o masa

ek ajab farhat-e-nau-rasta safar karti thi

lekin ab qurbaten hain baham

samaat ko magar

phone ki ghanTi ko sunne ko tarasti KHwahish

munqata rabita pane ke liye koshan hai

ungliyan rahti hain

ek ek button par raqsan

yahi mamul hai muddat se

magar, telephone

ek KHamosh sada deta hai

silsila lamhon ka

sadiyon sa bana deta hai