jahan dariya utarta hai

1

sarishk-e-ḳhūñ ruḳh-e-mazmūn pe chaltā hai to ik rasta

nikaltā hai

nadī dariyā pe tham jaa.e

lahū nuqte pe jam jaa.e to unvān-e-safar Thahre

usī raste pe sarkash raushnī tāroñ meñ Dhaltī hai

usī nuqte kī suulī par payambar baat karte haiñ

mujhe chalnā nahīñ aatā

shab-e-sākin kī ḳhāna-zād tasvīro gavāhī do

fasīl-e-sub.h-e-mumkin par mujhe chalnā nahīñ aatā

mire chashmoñ meñ shor-e-āb yakjā bar-shakālī hai

nadī maqrūz bādal kī

mirā dariyā savālī hai

rag-e-harf-e-zubūñ meñ jo charāġh-e-ḳhūñ safar meñ hai

abhī us nuqta-e-āḳhir ke ziine tak nahīñ aatā

jahāñ jallād kā ghar hai

jahāñ dīvār-e-sub.h-e-zāt ke raḳhne se nigah-e-ḳhashmagīñ

bārūd kī chashmak Darātī hai

jahāñ suulī ke mimbar par payambar baat karte haiñ

2

ab in bātoñ ke sikke jeb ke andar khanakte haiñ ki jin par

qasr-e-shāhī ke manāzir

aslaha-ḳhānoñ se jaarī hukm kunda haiñ

bhare bāzār meñ tifl-e-tahī-kīsa pareshāñ hai ki us ke paañv

Taksāloñ ke raste se abhī nā-āshnā haiñ

aur us kā baap gūñgā hai

nadī ruk ruk ke chaltī hai

takallum rehn rakhne se safar āsāñ nahīñ hotā

huā paspā jahāñ paanī

jahāñ maujoñ ne zanjīr-e-vafā pahnī sipar girdāb kī rakh dī

alam rakhe qalam rakhe

ḳhafā bādal ne jin pāyāb dariyāoñ se muñh moḌā

jahāñ tārāj hai khetī

jahāñ qarya ujaḌtā hai

tanāb-e-rāh kaTtī hai kahīñ ḳhema ukhaḌtā hai

vahāñ se duur hai nadī

vahāñ se duur hai bachcha ki us ke paañv

dariyāoñ ke raste se abhī nā-āshnā haiñ

aur us kā baap gūñgā hai

use chalnā nahīñ aatā

fasīl-e-sub.h-e-mumkin par use chalnā nahīñ aatā

3

sahar ke paas haiñ mansūḳh sharteñ sulh-nāme kī

sabā dars-e-ziyāñ-āmoz kī tafsīl rakhtī hai

kisī tamsīl meñ tum ho

kisī ijmāl meñ maiñ huuñ

kahīñ qirtās ḳhālī kā vo be-unvān sāhil hai

jahāñ āshuftagān-e-adl ne hathiyār Daale haiñ

bahut zāteñ haiñ sadmoñ kī

ka.ī hisse haiñ siine meñ nafas gum-karda lamhe ke

ka.ī tabqāt haiñ din ke

kahīñ sub.h-e-mukāfāt-e-suḳhan ke mantaqe meñ tum muqayyad ho

kisī pichhle pahar ke sulh-nāme kī adālat meñ

kaḌī shartoñ par apne dastaḳhat ke rū-ba-rū maiñ huuñ

suno qirtās-e-ḳhālī ke sipar-andāz sāhil se

havā kyā baat kahtī hai

idhar us dūsre sāhil se jo mallāh aayā hai

zamīneñ bechtī bastī se kyā paiġhām laayā hai

koī ta.azīr kī dhamkī

koī va.ada rihā.ī kā

koī aañsū

koī chhuTTī

1

sarishk-e-KHun ruKH-e-mazmun pe chalta hai to ek rasta

nikalta hai

nadi dariya pe tham jae

lahu nuqte pe jam jae to unwan-e-safar Thahre

usi raste pe sarkash raushni taron mein Dhalti hai

usi nuqte ki suli par payambar baat karte hain

mujhe chalna nahin aata

shab-e-sakin ki KHana-zad taswiro gawahi do

fasil-e-subh-e-mumkin par mujhe chalna nahin aata

mere chashmon mein shor-e-ab yakja bar-shakali hai

nadi maqruz baadal ki

mera dariya sawali hai

rag-e-harf-e-zubun mein jo charagh-e-KHun safar mein hai

abhi us nuqta-e-aKHir ke zine tak nahin aata

jahan jallad ka ghar hai

jahan diwar-e-subh-e-zat ke raKHne se nigah-e-KHashmagin

barud ki chashmak Daraati hai

jahan suli ke mimbar par payambar baat karte hain

2

ab in baaton ke sikke jeb ke andar khanakte hain ki jin par

qasr-e-shahi ke manazir

aslaha-KHanon se jari hukm kunda hain

bhare bazar mein tifl-e-tahi-kisa pareshan hai ki us ke panw

Taksalon ke raste se abhi na-ashna hain

aur us ka bap gunga hai

nadi ruk ruk ke chalti hai

takallum rehn rakhne se safar aasan nahin hota

hua paspa jahan pani

jahan maujon ne zanjir-e-wafa pahni sipar girdab ki rakh di

alam rakhe qalam rakhe

KHafa baadal ne jin payab dariyaon se munh moDa

jahan taraj hai kheti

jahan qarya ujaDta hai

tanab-e-rah kaTti hai kahin KHema ukhaDta hai

wahan se dur hai nadi

wahan se dur hai bachcha ki us ke panw

dariyaon ke raste se abhi na-ashna hain

aur us ka bap gunga hai

use chalna nahin aata

fasil-e-subh-e-mumkin par use chalna nahin aata

3

sahar ke pas hain mansuKH sharten sulh-name ki

saba dars-e-ziyan-amoz ki tafsil rakhti hai

kisi tamsil mein tum ho

kisi ijmal mein main hun

kahin qirtas KHali ka wo be-unwan sahil hai

jahan aashuftagan-e-adl ne hathiyar Dale hain

bahut zaten hain sadmon ki

kai hisse hain sine mein nafas gum-karda lamhe ke

kai tabqat hain din ke

kahin subh-e-mukafat-e-suKHan ke mantaqe mein tum muqayyad ho

kisi pichhle pahar ke sulh-name ki adalat mein

kaDi sharton par apne dastaKHat ke ru-ba-ru main hun

suno qirtas-e-KHali ke sipar-andaz sahil se

hawa kya baat kahti hai

idhar us dusre sahil se jo mallah aaya hai

zaminen bechti basti se kya paigham laya hai

koi tazir ki dhamki

koi wada rihai ka

koi aansu

koi chhuTTi