jahannam

jab paas nahīñ kuchh bhī mere

ḳhvāhish maqsad ādarsh ke TuuTe ā.īne

phir gardish-e-roz-o-shab kā mujhe ehsās hai kyuuñ

kyā ġham mujh ko jab sub.h kī koī fikr nahīñ

aur shām-e-alam se Dar bhī nahīñ

vo paañv meñ ab chakkar bhī nahīñ

saa.e kī koī hājat bhī nahīñ

ab maut kā khaTkā koī ḳhalish mauhūm tamannā kā armāñ

kuchh bhī to nahīñ

phir kaise maiñ kahtā huuñ mujhe

mausam ke badalte rañgoñ kā ehsās hai bas

aisā to nahīñ maiñ mar bhī chukā

aur koī nahīñ hai nauha-kunāñ

(māzī kī rivāyat, haal kā ġham fardā kī umīdeñ kyā hoñgī)

jab un se nahīñ maiñ vābasta

phir kyā hai koī raaz to hai

ik aag sī jaltī rahtī hai rag rag meñ mirī

ik be-ma.anī sā dard mirā ehsās jagātā rahtā hai

is tarah ki maiñ sab kuchh yūñhī mahsūs karūñ aur kuchh na kahūñ

jab tak ye jahannam raushan hai

maiñ zinda huuñ

jab pas nahin kuchh bhi mere

KHwahish maqsad aadarsh ke TuTe aaine

phir gardish-e-roz-o-shab ka mujhe ehsas hai kyun

kya gham mujh ko jab subh ki koi fikr nahin

aur sham-e-alam se Dar bhi nahin

wo panw mein ab chakkar bhi nahin

sae ki koi hajat bhi nahin

ab maut ka khaTka koi KHalish mauhum tamanna ka arman

kuchh bhi to nahin

phir kaise main kahta hun mujhe

mausam ke badalte rangon ka ehsas hai bas

aisa to nahin main mar bhi chuka

aur koi nahin hai nauha-kunan

(mazi ki riwayat, haal ka gham farda ki umiden kya hongi)

jab un se nahin main wabasta

phir kya hai koi raaz to hai

ek aag si jalti rahti hai rag rag mein meri

ek be-mani sa dard mera ehsas jagata rahta hai

is tarah ki main sab kuchh yunhi mahsus karun aur kuchh na kahun

jab tak ye jahannam raushan hai

main zinda hun