jalwa-e-parda-dar

kis ne kahā ki jā.iye kis ne kahā ki aa.iye

kis ne kahā ki dil se peñg shām-o-sahar baḌhā.iye

kis ne kahā matā-e-nāz nazr-e-niyāz kījiye

kis ne kahā haqīqateñ rehn-e-majāz kījiye

aap ne fitna-e-junūñ aap se aap uThā diyā

haath meñ le ke musht-e-ḳhāk aap ne dil banā diyā

aap ne dil ko ġham diyā ġham ko davām de diyā

jaam meñ Dhaal dī sharāb daur meñ jaam de diyā

ālam-e-kā.enāt meñ aap ne mastiyāñ bharīñ

jalvoñ se vādiyāñ bharīñ naġhmoñ se bastiyāñ bharīñ

aañkh khulī to aañkh meñ rang-e-bahār bhar diyā

shīsha-e-pāk-o-sāf meñ le ke ġhubār bhar diyā

zauq-e-nazar asīr-e-sang ho ke jo dar-ba-dar gayā

aap ga.e kashāñ kashāñ ishq jidhar jidhar gayā

ḳhuub hue nazar nazar kūcha-e-e.atibār meñ

kitne haiñ chaak dekhiye jalva-e-parda-dār meñ

kis ne kaha ki jaiye kis ne kaha ki aaiye

kis ne kaha ki dil se peng sham-o-sahar baDhaiye

kis ne kaha mata-e-naz nazr-e-niyaz kijiye

kis ne kaha haqiqaten rehn-e-majaz kijiye

aap ne fitna-e-junun aap se aap uTha diya

hath mein le ke musht-e-KHak aap ne dil bana diya

aap ne dil ko gham diya gham ko dawam de diya

jam mein Dhaal di sharab daur mein jam de diya

aalam-e-kaenat mein aap ne mastiyan bharin

jalwon se wadiyan bharin naghmon se bastiyan bharin

aankh khuli to aankh mein rang-e-bahaar bhar diya

shisha-e-pak-o-saf mein le ke ghubar bhar diya

zauq-e-nazar asir-e-sang ho ke jo dar-ba-dar gaya

aap gae kashan kashan ishq jidhar jidhar gaya

KHub hue nazar nazar kucha-e-eatibar mein

kitne hain chaak dekhiye jalwa-e-parda-dar mein