jamal

kahāñ se aa ga.iiñ rañgīniyāñ tamannā meñ

ki phir ḳhayāl ne laale khilā.e sahrā meñ

tirī nigāh se merī nazar meñ mastī hai

tire jamāl se maujeñ haiñ dil ke dariyā meñ

ye ho rahā hai gumāñ tere jism-e-ḳhūbī par

bhaTak ke huur chalī aa.ī ho na duniyā meñ

nazar meñ kuchle hue motiyoñ kī jhalkāreñ

laboñ pe rang jo miltā hai jām-o-mīnā meñ

vo muskurāte se āñkhoñ meñ be-shumār kañval

vo kasmasātī adā.eñ tamām a.azā meñ

jo goshe goshe meñ pinhāñ hai us kī rāh-e-gurez

ḳhayāl gum huā jaatā hai qadd-e-ra.anā meñ

jamāl-e-yār latīf aarzū hai us se latīf

ye aa.ī hai na vo aa.egā harf-e-sāda meñ

kahan se aa gain ranginiyan tamanna mein

ki phir KHayal ne lale khilae sahra mein

teri nigah se meri nazar mein masti hai

tere jamal se maujen hain dil ke dariya mein

ye ho raha hai guman tere jism-e-KHubi par

bhaTak ke hur chali aai ho na duniya mein

nazar mein kuchle hue motiyon ki jhalkaren

labon pe rang jo milta hai jam-o-mina mein

wo muskuraate se aankhon mein be-shumar kanwal

wo kasmasati adaen tamam aaza mein

jo goshe goshe mein pinhan hai us ki rah-e-gurez

KHayal gum hua jata hai qadd-e-rana mein

jamal-e-yar latif aarzu hai us se latif

ye aai hai na wo aaega harf-e-sada mein