jamal

kahāñ se aa ga.iiñ rañgīniyāñ tamannā meñ

ki phir ḳhayāl ne laale khilā.e sahrā meñ

tirī nigāh se merī nazar meñ mastī hai

tire jamāl meñ maujeñ haiñ us ke dariyā meñ

ye ho rahā hai gumāñ tere jism-e-ḳhūbī par

bhaTak ke huur chalī aa.ī ho na duniyā meñ

nazar se kuchle hue motiyoñ kī jhalkāreñ

laboñ pe rañg jo miltā hai jām-o-mīnā meñ

vo muskurāte se āñkhoñ meñ be-shumār kañval

vo kasmasātī adā.eñ tamām a.azā meñ

napā-tulā sā tabassum jachī huī sī nazar

sanī sanī sī vo palkeñ ġhubār-e-surmā meñ

vo narm niimā se kundan badan kī rañg-tarañg

banī huī sī vo kirneñ libās-e-zebā meñ

jo goshe goshe meñ pinhāñ hai us ke rāh-e-gurez

ḳhayāl gum huā jaatā hai qadd-e-ra.anā meñ

qadam qadam pe vahī tamkanat kā ek savāl

hai koī dūsrā ham sā savād-e-gañgā meñ

batā maiñ tujh se kahūñ kyā ba-juz vo shauq kī baat

ki Daal rakkhā hai jis ko javāz-e-ma.anī meñ

jamāl-e-yār latīf aarzū hai us se latīf

ye aa.ī hai na vo aa.egā harf-e-sāda meñ

kahan se aa gain ranginiyan tamanna mein

ki phir KHayal ne lale khilae sahra mein

teri nigah se meri nazar mein masti hai

tere jamal mein maujen hain us ke dariya mein

ye ho raha hai guman tere jism-e-KHubi par

bhaTak ke hur chali aai ho na duniya mein

nazar se kuchle hue motiyon ki jhalkaren

labon pe rang jo milta hai jam-o-mina mein

wo muskuraate se aankhon mein be-shumar kanwal

wo kasmasati adaen tamam aaza mein

napa-tula sa tabassum jachi hui si nazar

sani sani si wo palken ghubar-e-surma mein

wo narm nima se kundan badan ki rang-tarang

bani hui si wo kirnen libas-e-zeba mein

jo goshe goshe mein pinhan hai us ke rah-e-gurez

KHayal gum hua jata hai qadd-e-rana mein

qadam qadam pe wahi tamkanat ka ek sawal

hai koi dusra hum sa sawad-e-ganga mein

bata main tujh se kahun kya ba-juz wo shauq ki baat

ki Dal rakkha hai jis ko jawaz-e-mani mein

jamal-e-yar latif aarzu hai us se latif

ye aai hai na wo aaega harf-e-sada mein