jamaliyat

jamāliyāt kā naqqād jitnā hairāñ hai

vo bāb-e-husn meñ bhī utnā hī pareshāñ hai

jamāliyāt meñ kyā hai jo ḳhud nahīñ fan meñ

jamāliyāt kā mahvar nashāt-e-daurāñ hai

jamāliyāt ko farhañg meñ karo na talāsh

jamāliyāt meñ zulf-e-suḳhan kī afshāñ hai

jamāliyāt ko uslūb meñ shumār karo

jamāliyāt meñ har fard ik dabistāñ hai

jamāliyāt taġhayyur-pazīr hissiyat

jamāliyāt meñ sahrā bhī ik gulistāñ hai

jamāliyāt saqāfat kā haft rañg libās

jo rañg o nasl kī tafrīq se gurezāñ hai

jamāliyāt badalte haiñ māh-o-sāl ke saath

jamāliyāt meñ tārīḳh-e-fikr-e-insāñ hai

jamāliyāt haiñ taḳhlīq fan kā sar chashma

adiib adab ke liye ḳhud jamāl sāmāñ hai

jamāliyāt meñ hai husn-e-kār kā jaadū

jamāliyāt kī tasḳhīr kār-e-mardāñ hai

koī usuul nahīñ husn ke parakhne kā

kahīñ ḳhizāñ hai hasīñ aur kahīñ bahārāñ hai

jahāñ meñ jitne haiñ fankār utnī tarah ke husn

to kyā bañdhe Tike meyār-e-nau kā imkāñ hai

badaltā rahtā hai meyār-e-husn husn ke saath

to kis liye koī naqqād-e-fan pareshāñ hai

jamaliyat ka naqqad jitna hairan hai

wo bab-e-husn mein bhi utna hi pareshan hai

jamaliyat mein kya hai jo KHud nahin fan mein

jamaliyat ka mahwar nashat-e-dauran hai

jamaliyat ko farhang mein karo na talash

jamaliyat mein zulf-e-suKHan ki afshan hai

jamaliyat ko uslub mein shumar karo

jamaliyat mein har fard ek dabistan hai

jamaliyat taghayyur-pazir hissiyat

jamaliyat mein sahra bhi ek gulistan hai

jamaliyat saqafat ka haft rang libas

jo rang o nasl ki tafriq se gurezan hai

jamaliyat badalte hain mah-o-sal ke sath

jamaliyat mein tariKH-e-fikr-e-insan hai

jamaliyat hain taKHliq fan ka sar chashma

adib adab ke liye KHud jamal saman hai

jamaliyat mein hai husn-e-kar ka jadu

jamaliyat ki tasKHir kar-e-mardan hai

koi usul nahin husn ke parakhne ka

kahin KHizan hai hasin aur kahin bahaaran hai

jahan mein jitne hain fankar utni tarah ke husn

to kya bandhe Tike meyar-e-nau ka imkan hai

badalta rahta hai meyar-e-husn husn ke sath

to kis liye koi naqqad-e-fan pareshan hai