janaze mein to aaoge na mere

kabhī maiñ zindagī kī nāz-bardārī na kar paayā

hamesha biich meñ haa.il rahā ik ḳhvāb

pāgal ḳhvāb

sote jāgte jo dekhtā huuñ maiñ

ki sar hī sar janāze meñ haiñ mere

aur maiñ bānoñ kī na.ī ik chārpā.ī par sukūñ ke saath leTā hañs rahā huuñ

ik aisī bhiiḌ par

jo mujh ko kāñdhā dene ke liye aapas meñ jhagḌā kar rahī hai

mujhe ye zindagī pairoñ-tale jitnā kuchaltī hai

mirī is ḳhvāb se vābastagī baḌhtī hī jaatī hai

mire jaise kisī gumnām se ik shaḳhs kī āñkhoñ ne

aisā ḳhvāb kyuuñ dekhā

kahāñ dekhā

ye ḳhud mere liye bhī ik pahelī hai

magar hañsiye nahīñ is ḳhvāb par mere

mirā ye ḳhvāb hī to vo kaḌī hai

jo mujh ko zindagī se joḌtī hai

na jaane kab se vo fahrist maiñ tayyār karne lagā huuñ

likhe haiñ naam jis meñ aise logoñ ke

janāze meñ jinheñ honā hī honā chāhiye mere

so un logoñ se rishte bhī

bahut hamvār honā chāhiye mere

maiñ ye bhī jāntā huuñ

mujhe jis shaan se marne kī ḳhvāhish hai

vo mehnat māñgtī hai

kisī had tak bhī jhuk kar dushmanoñ se

sulh kar lene kī himmat māñgtī hai

mohabbat māñgtī hai

duā.eñ māñgtā huuñ zindagī kī is liye maiñ

ki mujh ko vo thoḌā vaqt mil jaa.e

na.e rishte banāne kā

ta.alluq gahre karne kā

vagarna kyuuñ bhalā aa.egā koī

maut ke din ghar pe mere

sanak kah lo ki pāgal-pan

idhar aa kar mirī ye dhun yahāñ tak baḌh ga.ī hai

ki ab maiñ dostoñ se

ḳhushī kī mahfiloñ meñ bhī ye aksar pūchh letā huuñ

janāze meñ to aaoge na mere?

yahāñ chāho to hañs sakte ho mujh par

magar lāshe pe to aañsū bahāoge na mere?

vo hañs dete haiñ merī baat par

aur maiñ kahīñ andar se jaise TuuT jaatā huuñ

magar jab bhī kabhī aisā huā hai

janāze ne mujhe kāñdhā diyā hai

mujhe jab bhī lagā aisā ki maiñ ab thak rahā huuñ

gir rahā huuñ

mire is ḳhvāb ne

mire apne janāze ne mujhe kāñdhā diyā hai

kabhi main zindagi ki naz-bardari na kar paya

hamesha bich mein hail raha ek KHwab

pagal KHwab

sote jagte jo dekhta hun main

ki sar hi sar janaze mein hain mere

aur main banon ki nai ek chaarpai par sukun ke sath leTa hans raha hun

ek aisi bhiD par

jo mujh ko kandha dene ke liye aapas mein jhagDa kar rahi hai

mujhe ye zindagi pairon-tale jitna kuchalti hai

meri is KHwab se wabastagi baDhti hi jati hai

mere jaise kisi gumnam se ek shaKHs ki aankhon ne

aisa KHwab kyun dekha

kahan dekha

ye KHud mere liye bhi ek paheli hai

magar hansiye nahin is KHwab par mere

mera ye KHwab hi to wo kaDi hai

jo mujh ko zindagi se joDti hai

na jaane kab se wo fahrist main tayyar karne laga hun

likhe hain nam jis mein aise logon ke

janaze mein jinhen hona hi hona chahiye mere

so un logon se rishte bhi

bahut hamwar hona chahiye mere

main ye bhi jaanta hun

mujhe jis shan se marne ki KHwahish hai

wo mehnat mangti hai

kisi had tak bhi jhuk kar dushmanon se

sulh kar lene ki himmat mangti hai

mohabbat mangti hai

duaen mangta hun zindagi ki is liye main

ki mujh ko wo thoDa waqt mil jae

nae rishte banane ka

talluq gahre karne ka

wagarna kyun bhala aaega koi

maut ke din ghar pe mere

sanak kah lo ki pagal-pan

idhar aa kar meri ye dhun yahan tak baDh gai hai

ki ab main doston se

KHushi ki mahfilon mein bhi ye aksar puchh leta hun

janaze mein to aaoge na mere?

yahan chaho to hans sakte ho mujh par

magar lashe pe to aansu bahaoge na mere?

wo hans dete hain meri baat par

aur main kahin andar se jaise TuT jata hun

magar jab bhi kabhi aisa hua hai

janaze ne mujhe kandha diya hai

mujhe jab bhi laga aisa ki main ab thak raha hun

gir raha hun

mere is KHwab ne

mere apne janaze ne mujhe kandha diya hai