jangal: ek hasht pahlu taswir

shahr ke aare chalāte be-sure bad-rañg shor-o-ġhul se duur

paak rañgoñ kā sanam ābād

paak āvāzoñ kā ik gandharv-lok

shahr vāloñ meñ hai jañgal jis kā naam

sub.h jis kī ek arzañg aur albam jis kī shaam

vo lachaktī fasl ke pahlū meñ kuhnī maar kar kilkāriyāñ bhartī huī

jhanjhanā uThte haiñ moTe chamchamate taar

tape par jaatī hai bal khātī huī āvāz

chhiḌ ga.ī ho duur jaise jal-tarañg

dauḌtī hai sansanī aisī umañg

jaise paanī meñ hazāroñ machhliyāñ ik saath kūdeñ aur chādar chiir jaa.eñ

jaise pakke kaam vaalī sāḌiyāñ lahrā.eñ sarsarā.eñ

gungunā.eñ jaise hañsoñ ke hujūm

gungunā.eñ sarmadī naġhme nujūm

vo sunahrī choliyoñ meñ kas-masāte, gol, ubhre, sāñvle Tiile

gol, ubhre, sāñvle Tiile sunahrī, tañg, raushan choliyāñ

kas-masāte, gol, ubhre sāñvle gadrā.e bhārī saḳht Tiile

vo sunahre-pan ko yāñ-vāñ phaaḌ kar ḳhud phaT paḌā hai shyām-rañg

baar se hai chāk-cholī jhāñktā hai sāñvlī dhartī kā añg

(yaad aatā hai yahāñ tashbīh kā samrāT kālī-dās)

vo khajūroñ ke daraḳhtoñ kī qatār-andar-qatār

ek-dam sīdhī khaḌī sambañdh rekhā.eñ zamīn-o-āsmāñ ke darmiyān

āsmānī shāmiyāna in sutūnoñ ke siroñ ko chhoḌ kar

be-sutūñ gumbad-sā ḳhud laTkā huā

aam kī Dāloñ pe chikne sabz patte

sabz pattoñ par laTaktī kairiyāñ

sabz nannhī kairiyāñ

rañg ras aur svaad ke ḳhvāboñ kī ta.abīroñ ke añkhve khil ga.e

sabz-pīlā sabz-bhūrā sabz-kālā sabz-zarrīñ sabz-nīlā

sabz sabz sabz sabz

sabz-ġhālib rañg kitnī joḌiyoñ ke saath phailā huā

sabz-ġhālib rañg baaqī rañg goyā is ke shade

rās-manDal meñ kanhayyā sabz baaqī us kī gopiyāñ

tez be-had tez be-dam hāñptī mauj-e-havā kī lai

tez be-had tez lekin naġhma-rez

jhūmtā gaatā thiraktā nāchtā māhaul

ek lai meñ raqs karte haiñ fazā dehāt jañgal khet

raqs meñ hai mauj-e-rañg

mauj meñ āvāz

aur phir āvāz meñ ḳhushbū kā raqs

sab ke sab haiñ ek lai ke dā.ere meñ ham-navā ham-raqs bāham ek

duur tak phailāo āzādī mohabbat aur chanchal shāñtī

ek jītī-jāgtī tābinda zinda shāñtī

phūlne-phalne sañvarne kar guzarne kā khulā imkān

shahr vāloñ meñ hai jañgal is kā naam

shahr ke aare chalate be-sure bad-rang shor-o-ghul se dur

pak rangon ka sanam aabaad

pak aawazon ka ek gandharw-lok

shahr walon mein hai jangal jis ka nam

subh jis ki ek arzang aur albam jis ki sham

wo lachakti fasl ke pahlu mein kuhni mar kar kilkariyan bharti hui

jhanjhana uThte hain moTe chamchamate tar

tape par jati hai bal khati hui aawaz

chhiD gai ho dur jaise jal-tarang

dauDti hai sansani aisi umang

jaise pani mein hazaron machhliyan ek sath kuden aur chadar chir jaen

jaise pakke kaam wali saDiyan lahraen sarsaraen

gungunaen jaise hanson ke hujum

gungunaen sarmadi naghme nujum

wo sunahri choliyon mein kas-masate, gol, ubhre, sanwle Tile

gol, ubhre, sanwle Tile sunahri, tang, raushan choliyan

kas-masate, gol, ubhre sanwle gadrae bhaari saKHt Tile

wo sunahre-pan ko yan-wan phaD kar KHud phaT paDa hai shyam-rang

bar se hai chaak-choli jhankta hai sanwli dharti ka ang

(yaad aata hai yahan tashbih ka samraT kali-das)

wo khajuron ke daraKHton ki qatar-andar-qatar

ek-dam sidhi khaDi sambandh rekhaen zamin-o-asman ke darmiyan

aasmani shamiyana in sutunon ke siron ko chhoD kar

be-sutun gumbad-sa KHud laTka hua

aam ki Dalon pe chikne sabz patte

sabz patton par laTakti kairiyan

sabz nannhi kairiyan

rang ras aur swad ke KHwabon ki tabiron ke ankhwe khil gae

sabz-pila sabz-bhura sabz-kala sabz-zarrin sabz-nila

sabz sabz sabz sabz

sabz-ghaalib rang kitni joDiyon ke sath phaila hua

sabz-ghaalib rang baqi rang goya is ke shade

ras-manDal mein kanhayya sabz baqi us ki gopiyan

tez be-had tez be-dam hanpti mauj-e-hawa ki lai

tez be-had tez lekin naghma-rez

jhumta gata thirakta nachta mahaul

ek lai mein raqs karte hain faza dehat jangal khet

raqs mein hai mauj-e-rang

mauj mein aawaz

aur phir aawaz mein KHushbu ka raqs

sab ke sab hain ek lai ke daere mein ham-nawa ham-raqs baham ek

dur tak phailao aazadi mohabbat aur chanchal shanti

ek jiti-jagti tabinda zinda shanti

phulne-phalne sanwarne kar guzarne ka khula imkan

shahr walon mein hai jangal is ka nam