jangal ki lakDiyan

pahāḌī rāstoñ par

lakḌiyoñ kī gaThriyāñ sar par sambhāle

jā rahā hai ādī-vāsī auratoñ kā qāfila

ye qāfila kuchh duur jā kar

gaañv ke bāzār meñ Thahregā

aur phir lakḌiyāñ sar se utārī jā.eñgī

ḳhūbsūrat jañgaloñ se kaaT kar

laa.ī ga.ī ye lakḌiyāñ

bāzār kī zīnat baneñgī

lakḌiyoñ kā bojh Dho kar

laane vaalī aurteñ

ḳhāmosh rah kar

dil hī dil meñ

apne haTTe-kaTTe mardoñ kī

javāñ-mardī ke naġhme gā.eñgī

aur gaañv ke bāzār se kuchh duur

un ke mard

apnī tez kulhāḌī se

jañgal kā safāyā karne meñ

masrūf hoñge

ye vahī jañgal hai jis kā husn

qaa.em thā inhīñ shaidā.iyoñ se

zarre zarre meñ

isī jañgal ke goshe goshe meñ

shaidā.iyoñ kī ruuh bastī thī

isī jañgal meñ un kā jism lāġhar ho chalā hai

aur apnī zindagī ko

baaqī rakhne kā yahī ik rāsta

in ko nazar aayā hai

jañgal ḳhatm kar ke ḳhud vo jiinā chāhte haiñ

ham taraqqī ke hazāroñ da.ave

karne vaale dānish-mand

andar se bahut hī khokhle haiñ

pahaDi raston par

lakDiyon ki gaThriyan sar par sambhaale

ja raha hai aadi-wasi auraton ka qafila

ye qafila kuchh dur ja kar

ganw ke bazar mein Thahrega

aur phir lakDiyan sar se utari jaengi

KHubsurat jangalon se kaT kar

lai gai ye lakDiyan

bazar ki zinat banengi

lakDiyon ka bojh Dho kar

lane wali aurten

KHamosh rah kar

dil hi dil mein

apne haTTe-kaTTe mardon ki

jawan-mardi ke naghme gaengi

aur ganw ke bazar se kuchh dur

un ke mard

apni tez kulhaDi se

jangal ka safaya karne mein

masruf honge

ye wahi jangal hai jis ka husn

qaem tha inhin shaidaiyon se

zarre zarre mein

isi jangal ke goshe goshe mein

shaidaiyon ki ruh basti thi

isi jangal mein un ka jism laghar ho chala hai

aur apni zindagi ko

baqi rakhne ka yahi ek rasta

in ko nazar aaya hai

jangal KHatm kar ke KHud wo jina chahte hain

hum taraqqi ke hazaron dawe

karne wale danish-mand

andar se bahut hi khokhle hain