janm janm ki kahani

kuchh din pahle tak maiñ kabūtar thī

āñkheñ band kar ke sochtī

ki duniyā se billiyoñ kā vajūd miT chukā hai

aur us se bhī pahle

maiñ chakor aur tītar ke darmiyān koī shai thī

sub.hān terī qudrat kī bolī boltī thī

aur chāñdnī-rāt meñ be-qarār rahtī thī

jab maiñ us se bhī pahle

kutiyā thī to saarā saarā din

apne mālik ke paañv chāTtī rahtī thī

magar mere pyaar kā ye sila milā

ki vo ek aur kutiyā le aayā

is se pahle ke janm meñ

maiñ ek ḳhūb-sūrat hirnī thī

vo zamāna sab se achchhā thā

magar bahut jaldī guzar gayā

aur mujhe kutiyā ban jaanā paḌā

hirnī se pahle kā arsa

maiñ ne ḳhargosh ban kar guzāra thā

mujh se sab pyaar kiyā karte the

maiñ bhī sab ko chāhtī thī

tab maiñ narm narm hotī thī

āj-kal maiñ ek bakrī huuñ

sochtī huuñ

bahut jī liyā hai

merā mālik ek saḳht-dil aadmī hai

an-qarīb vo kisī qasā.ī ke haath

mujhe bech degā

aur log merā gosht

khāte hue socheñge

dekhne meñ to achchhā thā

jaane kyuuñ galā nahīñ

kuchh din pahle tak main kabutar thi

aankhen band kar ke sochti

ki duniya se billiyon ka wajud miT chuka hai

aur us se bhi pahle

main chakor aur titar ke darmiyan koi shai thi

subhan teri qudrat ki boli bolti thi

aur chandni-raat mein be-qarar rahti thi

jab main us se bhi pahle

kutiya thi to sara sara din

apne malik ke panw chaTti rahti thi

magar mere pyar ka ye sila mila

ki wo ek aur kutiya le aaya

is se pahle ke janm mein

main ek KHub-surat hirni thi

wo zamana sab se achchha tha

magar bahut jaldi guzar gaya

aur mujhe kutiya ban jaana paDa

hirni se pahle ka arsa

main ne KHargosh ban kar guzara tha

mujh se sab pyar kiya karte the

main bhi sab ko chahti thi

tab main narm narm hoti thi

aaj-kal main ek bakri hun

sochti hun

bahut ji liya hai

mera malik ek saKHt-dil aadmi hai

an-qarib wo kisi qasai ke hath

mujhe bech dega

aur log mera gosht

khate hue sochenge

dekhne mein to achchha tha

jaane kyun gala nahin