jannat se dur

gavāhī hashr ke din

tamām a.azā ke saath

ham insānoñ kī ḳhālī jeb kī bhī maan lī jaa.e

to mumkin hai ki beḌā paar ho jaa.e

razā aur sabr kī tākīd par

vo sirf aur sirf ḳhālī jeb hai insān kī jo

bahut khul kar ḳhudā se baat kar saktī hai shāyad

vahī hai jo farishtoñ kī likhī sīdhī sapāT a.amāl kī rūdād meñ bhī

na.e kuchh rañg bhar saktī hai shāyad

magar Thahro

bahut ḳhush-fahm mat ho

sunā ye hai ḳhudā kī jeb uupar tak bharī rahtī hai har dam

aur kabhī ḳhālī nahīñ hotī

use to donoñ hāthoñ se luTānā bāñTanā aatā hai bas

aisī rivāyat hai

yahī to peñch hai

vo ḳhud jis tajrabe se duur hai

us ko nazar meñ rakh ke koī faisla karnā

use manzūr hogā kyaa?

abhī kuchh der pahle lag rahā thā

ab hameñ aisā nahīñ lagtā

ki ḳhālī jeb aur us ke dalā.el kā koī us par asar hogā

to matlab ye huā

ham log ab bhī duur haiñ utnā hī jannat se

ki jitnā ye ḳhayāl aane se pahle the

gawahi hashr ke din

tamam aaza ke sath

hum insanon ki KHali jeb ki bhi man li jae

to mumkin hai ki beDa par ho jae

raza aur sabr ki takid par

wo sirf aur sirf KHali jeb hai insan ki jo

bahut khul kar KHuda se baat kar sakti hai shayad

wahi hai jo farishton ki likhi sidhi sapaT aamal ki rudad mein bhi

nae kuchh rang bhar sakti hai shayad

magar Thahro

bahut KHush-fahm mat ho

suna ye hai KHuda ki jeb upar tak bhari rahti hai har dam

aur kabhi KHali nahin hoti

use to donon hathon se luTana banTana aata hai bas

aisi riwayat hai

yahi to pench hai

wo KHud jis tajrabe se dur hai

us ko nazar mein rakh ke koi faisla karna

use manzur hoga kya?

abhi kuchh der pahle lag raha tha

ab hamein aisa nahin lagta

ki KHali jeb aur us ke dalael ka koi us par asar hoga

to matlab ye hua

hum log ab bhi dur hain utna hi jannat se

ki jitna ye KHayal aane se pahle the