jashn-e-azadi

barq-raftārī pe apnī rashk kartā thā jahāñ

sū-e-āzādī hamārā qāfila thā tez-gām

sīkhnā hai lekin ab mai-ḳhāna-e-ta.amīr meñ

jumbish-e-nabz-e-tamannā o ḳhirām-e-daur-e-jām

manzil-e-maqsūd tak ye qaum jā saktī nahīñ

jis ke qabze meñ nahīñ asp-e-siyāsat kī lagām

ham ko bachnā chāhiye har us bure iqdām se

jis se ho matūn duniyā meñ vatan kā nek naam

ittihād o āshtī har dam raheñ pesh-e-nazar

jā-guzīñ dil meñ rahe zauq-e-amal bil-iltizām

daur-e-āzādī kā gauhar aish hai aish-e-halāl

dil ye kahtā hai ki yuuñ pāband honā hai harām

dil kī talqīnāt par pahle amal farmā.iye

shauq se phir jashn-e-āzādī manāte jā.iye

aish ke sāmāñ bhī hoñ aur farz kā ehsās bhī

jashn bhī ho ġham-zadoñ kī nāz-bardārī bhī ho

dāḳhil-e-ādāb-e-mai-noshī ho saaqī kā adab

mastiyāñ hoñ mastiyoñ ke saath hushyārī bhī ho

kuchh piyeñ aur kuchh bachā.eñ tishna-kāmoñ ke liye

sādgī kā naaz bhī andāz-e-purkārī bhī ho

haal kī ḳhātir ḳhirad-koshī hai mustahsan magar

bahr-e-mustaqbil junūn-e-zauq-e-bedārī bhī ho

narm-raftārī ho vaqt-e-sair-e-gulzār-e-tarab

rāh-e-pur-ḳhār-e-amal meñ garm-raftārī bhī ho

is ḳhushī ke vaqt kitne dil haiñ ġham se pā.emāl

lutf aa jaa.e agar in sab kī ġham-ḳhvārī bhī ho

rone vāloñ kī hañsī ko pahle vāpas lā.iye

shauq se phir jashn-e-āzādī manāte jā.iye

barq-raftari pe apni rashk karta tha jahan

su-e-azadi hamara qafila tha tez-gam

sikhna hai lekin ab mai-KHana-e-tamir mein

jumbish-e-nabz-e-tamanna o KHiram-e-daur-e-jam

manzil-e-maqsud tak ye qaum ja sakti nahin

jis ke qabze mein nahin asp-e-siyasat ki lagam

hum ko bachna chahiye har us bure iqdam se

jis se ho matun duniya mein watan ka nek nam

ittihad o aashti har dam rahen pesh-e-nazar

ja-guzin dil mein rahe zauq-e-amal bil-iltizam

daur-e-azadi ka gauhar aish hai aish-e-halal

dil ye kahta hai ki yun paband hona hai haram

dil ki talqinat par pahle amal farmaiye

shauq se phir jashn-e-azadi manate jaiye

aish ke saman bhi hon aur farz ka ehsas bhi

jashn bhi ho gham-zadon ki naz-bardari bhi ho

daKHil-e-adab-e-mai-noshi ho saqi ka adab

mastiyan hon mastiyon ke sath hushyari bhi ho

kuchh piyen aur kuchh bachaen tishna-kaamon ke liye

sadgi ka naz bhi andaz-e-purkari bhi ho

haal ki KHatir KHirad-koshi hai mustahsan magar

bahr-e-mustaqbil junun-e-zauq-e-bedari bhi ho

narm-raftari ho waqt-e-sair-e-gulzar-e-tarab

rah-e-pur-KHar-e-amal mein garm-raftari bhi ho

is KHushi ke waqt kitne dil hain gham se paemal

lutf aa jae agar in sab ki gham-KHwari bhi ho

rone walon ki hansi ko pahle wapas laiye

shauq se phir jashn-e-azadi manate jaiye