jashn-e-azadi

meñh barastā hai to dhartī kī nazar jhūmtī hai

phuul khilte haiñ to gulshan pe nikhār aatā hai

lekin ai jashn-e-bahārāñ ke na.e muntazimo

ḳhud-farebī se kahīñ dil ko qarār aatā hai

tum agar jashn-e-bahārāñ bhī kahoge is ko

maut ke ghaaT ye dhoka bhī utar jā.egā

bād-e-sarsar ko agar tum ne kahā mauj-e-nasīm

is se mausam meñ koī farq nahīñ aa.egā

ye gulistāñ ye gulistāñ meñ sisakte ġhunche

apne a.amāl ke parde meñ inheñ Dhāñp to lo

eqtidār aaj bhī sargarm-e-safar hai lekin

be-navāoñ ke irādoñ ko zarā bhāñp to lo

aaj insān kī azmat ne kiyā hai elaan

ḳhud-farebī se koī jī ko na bahalā.egā

jab tak ārā.ish-e-gulzār nahīñ ho jaatī

kisī koñpal kisī ġhunche ko na chain aa.egā

lekin ai jashn-e-bahārāñ ke na.e muntazimo

ye tamāshā hameñ be-kār nazar aatā hai

meñh barastā hai na dhartī kī nazar jhūmtī hai

phuul khilte haiñ na gulshan pe nikhār aatā hai

meinh barasta hai to dharti ki nazar jhumti hai

phul khilte hain to gulshan pe nikhaar aata hai

lekin ai jashn-e-bahaaran ke nae muntazimo

KHud-farebi se kahin dil ko qarar aata hai

tum agar jashn-e-bahaaran bhi kahoge is ko

maut ke ghaT ye dhoka bhi utar jaega

baad-e-sarsar ko agar tum ne kaha mauj-e-nasim

is se mausam mein koi farq nahin aaega

ye gulistan ye gulistan mein sisakte ghunche

apne aamal ke parde mein inhen Dhanp to lo

eqtidar aaj bhi sargarm-e-safar hai lekin

be-nawaon ke iradon ko zara bhanp to lo

aaj insan ki azmat ne kiya hai elan

KHud-farebi se koi ji ko na bahalaega

jab tak aaraish-e-gulzar nahin ho jati

kisi konpal kisi ghunche ko na chain aaega

lekin ai jashn-e-bahaaran ke nae muntazimo

ye tamasha hamein be-kar nazar aata hai

meinh barasta hai na dharti ki nazar jhumti hai

phul khilte hain na gulshan pe nikhaar aata hai