jast

mirā haal ye thā

zamistāñ meñ jab barf-zāroñ meñ chalte hue

gurisna bheḌiyoñ kī qatāreñ guzartīñ

to meñ kapkapātā

ye jī chāhtā arsa-e-zīst ko chhoḌ kar

kohsāroñ ke us paar Derā lagā luuñ

idhar mere jaate hī barfeñ pighal jaa.eñ

gurgān-e-be-mehr mere nuqūsh-e-qadam sūñgh kar mujh tak aane na paa.eñ

magar ab to jaise

mirī ruuh meñ koī chītā sā añgḌā.iyāñ le rahā hai

ye jī chāhtā hai

ki gurg-e-āshtī kī sabhā jab lage

maiñ bhī tasvīr jaisī khulī aañkh le kar

jo hargiz jhapaktī na ho

ġhaar ke vast meñ aan baiThūñ

aur un meñ se jis jis kī āñkheñ jhapaktī chalī jaa.eñ

vo lahza lahza mirā rizq ho

maiñ use pāra-pāra karūñ

mera haal ye tha

zamistan mein jab barf-zaron mein chalte hue

gurisna bheDiyon ki qataren guzartin

to mein kapkapata

ye ji chahta arsa-e-zist ko chhoD kar

kohsaron ke us par Dera laga lun

idhar mere jate hi barfen pighal jaen

gurgan-e-be-mehr mere nuqush-e-qadam sungh kar mujh tak aane na paen

magar ab to jaise

meri ruh mein koi chita sa angDaiyan le raha hai

ye ji chahta hai

ki gurg-e-ashti ki sabha jab lage

main bhi taswir jaisi khuli aankh le kar

jo hargiz jhapakti na ho

ghaar ke wast mein aan baiThun

aur un mein se jis jis ki aankhen jhapakti chali jaen

wo lahza lahza mera rizq ho

main use para-para karun