jawahar-lal

usī se taaza huī rasm-e-nekī-o-ḳhūbī

usī ke dam se vatan par thā rahmatoñ kā nuzūl

alam uThā ke chalā thā vo amn-e-ālam kā

zamāne-bhar ke liye us ne rakkhā ek usuul

bharī thī zaat meñ us kī baḌī baḌī tāsīr

qubūl baat huī us kī ḳhud huā maqbūl

maqām us kā mashāhīr kī saf-e-avval

har ek harf pasandīda har suḳhan maqbūl

na gard-e-ġham se huā us kā qalb ālūda

na us ke chehre pe dekhī kabhī malāl kī dhuul

dayār-e-hind kā kirdār-sāz nek sarisht

vo rāhatoñ kā payambar vo nekiyoñ kā rasūl

fazā.eñ jis se mo.attar haiñ aur ambar-rez

mahak rahā hai vatan meñ vahī gulāb kā phuul

mizāj jis kā mohabbat thā aur shagufta dil

shi.ār jis kā sharāfat thā mustaqil ma.amūl

qadam pe us ke fidā dānish aur ilm-o-yaqīñ

hazār kahte haiñ insān ko zalūm-o-jahūl

mashām-e-jān-e-jahāñ mushk-bār hai jis se

har ek barg pe rañg-e-bahār hai jis se

jamāliyāt kā ghar kohsār hai jis se

subū-ba-dosh har ik bāda-ḳhvār hai jis se

karam hai sāqi-e-mai-ḳhāna kā bahut gul-rez

havā.eñ jis se mo.attar haiñ aur ambar-rez

mahak rahā hai vatan meñ vahī gulāb kā phuul

usi se taza hui rasm-e-neki-o-KHubi

usi ke dam se watan par tha rahmaton ka nuzul

alam uTha ke chala tha wo amn-e-alam ka

zamane-bhar ke liye us ne rakkha ek usul

bhari thi zat mein us ki baDi baDi tasir

qubul baat hui us ki KHud hua maqbul

maqam us ka mashahir ki saf-e-awwal

har ek harf pasandida har suKHan maqbul

na gard-e-gham se hua us ka qalb aaluda

na us ke chehre pe dekhi kabhi malal ki dhul

dayar-e-hind ka kirdar-saz nek sarisht

wo rahaton ka payambar wo nekiyon ka rasul

fazaen jis se moattar hain aur ambar-rez

mahak raha hai watan mein wahi gulab ka phul

mizaj jis ka mohabbat tha aur shagufta dil

shiar jis ka sharafat tha mustaqil mamul

qadam pe us ke fida danish aur ilm-o-yaqin

hazar kahte hain insan ko zalum-o-jahul

masham-e-jaan-e-jahan mushk-bar hai jis se

har ek barg pe rang-e-bahaar hai jis se

jamaliyat ka ghar kohsar hai jis se

subu-ba-dosh har ek baada-KHwar hai jis se

karam hai saqi-e-mai-KHana ka bahut gul-rez

hawaen jis se moattar hain aur ambar-rez

mahak raha hai watan mein wahi gulab ka phul