jawan beTi se bap ka KHitab

mirī beTī mirī jānāñ

tumheñ sab yaad to hogā

bahut pahle bahut pahle

javānī kā thā jab aalam

mire baazū meñ tāqat thī

mire siine meñ himmat thī

unheñ ayyām meñ ik din

mirī āġhosh-e-ulfat meñ

kisī ne lā ke rakkhā thā

tumhārā phuul sā chehra

badan be-intihā nāzuk

mire in saḳht hāthoñ meñ

ajab narmī sī aa.ī thī

mirī is aañkh ne bū se liye the aur roī thī

mujhe to yaad hai sab kuchh

tumheñ bhī yaad to hogā

na.e kapḌe khilaune duudh kī botal ḳharīdī thī

bahut bechain hotā thā jo tum rātoñ ko rotī thiiñ

chalī thiiñ apne pairoñ par jo tum pahle-pahal beTā

mujhe aisā lagā thā chal paḌī dil kī mire dhaḌkan

qadam do chaar le kar tum jo ik-dam laḌkhaḌā.ī thiiñ

mirī sāñseñ mire siine ke andar thartharā.ī thiiñ

mirī godī meñ rafta rafta din guzrā kiye aur tum

na jaane sote sote mere siine par javānī tak

mirī jaañ aaj aa.ī ho

tumheñ mujh se shikāyat hai

ki maiñ ne saḳhtiyāñ kī haiñ

mirī vo saḳhtiyāñ tum ko bahut ranjūr kartī thiiñ

mujhe bhī rañj hotā thā

magar thī tarbiyat lāzim

tumheñ sāñche meñ Dhalnā thā

tabī.at ko badalnā thā

tumheñ sab yaad to hogā

mirī beTī mire baazū meñ vo quvvat nahīñ baaqī

tumhārī har ḳhushī kī haiñ zamānat dhaḌkaneñ merī

magar ik mashvara sun lo

ki ab sab bhuul jaao tum

na.e rishte banāo tum

hamārā saath chhūTegā

na.e rishtoñ ke merī jaañ masā.il kam nahīñ hoge

magar tab ham nahīñ hoñge

akelī jaan hogī tum

faqat vo tarbiyat hogī

jo maiñ ne saḳhtiyāñ kar ke

tumhāre dil meñ Daalī hai

vo tum ko yaad to hogī

sabaq sab yaad to hogā

meri beTi meri jaanan

tumhein sab yaad to hoga

bahut pahle bahut pahle

jawani ka tha jab aalam

mere bazu mein taqat thi

mere sine mein himmat thi

unhen ayyam mein ek din

meri aaghosh-e-ulfat mein

kisi ne la ke rakkha tha

tumhaara phul sa chehra

badan be-intiha nazuk

mere in saKHt hathon mein

ajab narmi si aai thi

meri is aankh ne bu se liye the aur roi thi

mujhe to yaad hai sab kuchh

tumhein bhi yaad to hoga

nae kapDe khilaune dudh ki botal KHaridi thi

bahut bechain hota tha jo tum raaton ko roti thin

chali thin apne pairon par jo tum pahle-pahal beTa

mujhe aisa laga tha chal paDi dil ki mere dhaDkan

qadam do chaar le kar tum jo ik-dam laDkhaDai thin

meri sansen mere sine ke andar thartharai thin

meri godi mein rafta rafta din guzra kiye aur tum

na jaane sote sote mere sine par jawani tak

meri jaan aaj aai ho

tumhein mujh se shikayat hai

ki main ne saKHtiyan ki hain

meri wo saKHtiyan tum ko bahut ranjur karti thin

mujhe bhi ranj hota tha

magar thi tarbiyat lazim

tumhein sanche mein Dhalna tha

tabiat ko badalna tha

tumhein sab yaad to hoga

meri beTi mere bazu mein wo quwwat nahin baqi

tumhaari har KHushi ki hain zamanat dhaDkanen meri

magar ek mashwara sun lo

ki ab sab bhul jao tum

nae rishte banao tum

hamara sath chhuTega

nae rishton ke meri jaan masail kam nahin hoge

magar tab hum nahin honge

akeli jaan hogi tum

faqat wo tarbiyat hogi

jo main ne saKHtiyan kar ke

tumhaare dil mein Dali hai

wo tum ko yaad to hogi

sabaq sab yaad to hoga