jawani

javānī kyā hai tum se kyā kaheñ ham

javānī kā hai ab piirī meñ mātam

javānī sho'la-e-ātish-fishāñ hai

javānī ziist kā rāz-e-nihāñ hai

javānī hai javāb-e-ḳhanda-e-gul

javānī ehtimām-e-sāġhar-o-mul

javānī iztirāb-e-zindagī hai

javānī pech-o-tāb-e-zindagī hai

javānī zindagī kā ik tabassum

javānī zindagī kā ik tarannum

javānī matla’-e-nūr-e-sahar hai

javānī rashk-e-ḳhurshīd-o-qamar hai

javānī zindagī kā ḳhūn-e-tāza

javānī chehra-e-insāñ kā ġhāza

javānī kyā sharāb-e-zindagī hai

javānī iltihāb-e-zindagī hai

javānī garmī-e-bāzār-e-'ālam

javānī gesū-e-ḳhamdār-e-'ālam

javānī ḳhāmushī kī guftugū hai

javānī ḳhūb-sūrat ḳhūb-rū hai

javānī hai bahār-e-zindagānī

javānī lāla-zār-e-zindagānī

javānī meñ 'ajab ik dilkashī hai

javānī meñ 'ajab ik mah-vashī hai

javānī zindagī kā naqsh-e-avval

javānī ek shorish ek halchal

javānī sāya-e-bāl-e-humā hai

javānī meñ jahāñ bhī zer-e-pā hai

javānī jaise paanī kī ravānī

javānī meñ har ik ġham paanī paanī

javānī meñ nihāñ ik bāñkpan hai

javānī zindagānī kī dulhan hai

javānī ibtidā-e-zauq-e-parvāz

javānī intihā-e-shauq-e-parvāz

javānī ek harf-e-dil-nashīñ hai

javānī ziist kā tāj-o-nagīñ hai

javānī zindagānī kā hai dam-ḳham

javānī tāqat-e-sohrāb-o-rustam

javānī āsmān-e-zindagī hai

javānī hī nishān-e-zindagī hai

javānī kohkan kā zor-e-bāzū

javānī ek afsūñ ek jaadū

javānī joshish-e-kirdār-e-paiham

javānī garmī-e-raftār-e-paiham

javānī maḳhzan-e-harf-o-hikāyāt

javānī markaz-e-kashf-o-karāmāt

javānī chashma-e-tasnīm-o-kausar

javānī āb-e-rahmat kā samundar

javānī laġhzish-e-mastāna-e-'ishq

javānī bāzī-e-tiflāna-e-'ishq

javānī dāstān-e-'qais-o-lailā'

javānī qissa-e-yūsuf-zuleḳhā

javānī kyā hai barq-e-tūr goyā

javānī kyā jamāl-e-hūr goyā

javānī sozish-e-roz-e-qayāmat

javānī ek hiddat ik harārat

javānī ḳhud-sitā.ī ḳhud-numā.ī

javānī jang-jūī kaj-adā.ī

javānī zindagī kā zamzama hai

javānī zindagī kā tantana hai

magar ab zindagī ko saath le kar

javānī jā chukī piirī ko de kar

javānī ko na pūchho ab kahāñ hai

javānī sham'-e-kushta kā dhuāñ hai

jawani kya hai tum se kya kahen hum

jawani ka hai ab piri mein matam

jawani sho'la-e-atish-fishan hai

jawani zist ka raaz-e-nihan hai

jawani hai jawab-e-KHanda-e-gul

jawani ehtimam-e-saghar-o-mul

jawani iztirab-e-zindagi hai

jawani pech-o-tab-e-zindagi hai

jawani zindagi ka ek tabassum

jawani zindagi ka ek tarannum

jawani matla’-e-nur-e-sahar hai

jawani rashk-e-KHurshid-o-qamar hai

jawani zindagi ka KHun-e-taza

jawani chehra-e-insan ka ghaza

jawani kya sharab-e-zindagi hai

jawani iltihab-e-zindagi hai

jawani garmi-e-bazar-e-'alam

jawani gesu-e-KHamdar-e-'alam

jawani KHamushi ki guftugu hai

jawani KHub-surat KHub-ru hai

jawani hai bahaar-e-zindagani

jawani lala-zar-e-zindagani

jawani mein 'ajab ek dilkashi hai

jawani mein 'ajab ek mah-washi hai

jawani zindagi ka naqsh-e-awwal

jawani ek shorish ek halchal

jawani saya-e-baal-e-huma hai

jawani mein jahan bhi zer-e-pa hai

jawani jaise pani ki rawani

jawani mein har ek gham pani pani

jawani mein nihan ek bankpan hai

jawani zindagani ki dulhan hai

jawani ibtida-e-zauq-e-parwaz

jawani intiha-e-shauq-e-parwaz

jawani ek harf-e-dil-nashin hai

jawani zist ka taj-o-nagin hai

jawani zindagani ka hai dam-KHam

jawani taqat-e-sohrab-o-rustam

jawani aasman-e-zindagi hai

jawani hi nishan-e-zindagi hai

jawani kohkan ka zor-e-bazu

jawani ek afsun ek jadu

jawani joshish-e-kirdar-e-paiham

jawani garmi-e-raftar-e-paiham

jawani maKHzan-e-harf-o-hikayat

jawani markaz-e-kashf-o-karamat

jawani chashma-e-tasnim-o-kausar

jawani aab-e-rahmat ka samundar

jawani laghzish-e-mastana-e-'ishq

jawani bazi-e-tiflana-e-'ishq

jawani dastan-e-'qais-o-laila'

jawani qissa-e-yusuf-zuleKHa

jawani kya hai barq-e-tur goya

jawani kya jamal-e-hur goya

jawani sozish-e-roz-e-qayamat

jawani ek hiddat ek hararat

jawani KHud-sitai KHud-numai

jawani jang-jui kaj-adai

jawani zindagi ka zamzama hai

jawani zindagi ka tantana hai

magar ab zindagi ko sath le kar

jawani ja chuki piri ko de kar

jawani ko na puchho ab kahan hai

jawani sham'-e-kushta ka dhuan hai