jawaz

pyāre bachcho patā hai ḳhudā ne tumheñ kyuuñ banāyā hai

is liye ki tum vaj.h be-vaj.h muskurāo

aur uljhanoñ aur bakheḌoñ meñ paḌe maañ baap ko muskurāne par majbūr kar do

pyāre laḌko patā hai ḳhudā ne tumheñ kyuuñ banāyā hai

is liye ki tum har har us muhim meñ be-ḳhatar kuud paḌo jo baḌe sar karnā chāhte the

lekin buz-dilī yā ḳhauf kī vaj.h se na kar sake

pyārī laḌkiyo patā hai ḳhudā ne tumheñ kyuuñ banāyā hai

is liye ki tum zindagī kā dāman husn-e-do-ālam se bhar do

aur vīrānoñ meñ bhī qadam rakho to vahāñ chupke se bahār aa jaa.e

pyārī aurto patā hai ḳhudā ne tumheñ kyuuñ banāyā hai

is liye ki tum mohabbat ke jaadū se zamīn ke siine ko paak kar do

nafrat se nifāq se nā-umīdī hai

pyāre mardo patā hai ḳhudā ne tumheñ kyuuñ banāyā hai

is liye ki tum hāthoñ meñ haath Daal kar aur saroñ se sar joḌ kar hifāzat karo

amn kī āzādī kī insāf kī

pyāre buzurgo patā hai ḳhudā ne tumheñ kyuuñ banāyā hai

is liye ki tum kaaT sako jo tum ne boyā thā

aur aane vaalī nasloñ ko muñh bhar ke batā sako ki unheñ kyā bonā chāhiye

pyare bachcho pata hai KHuda ne tumhein kyun banaya hai

is liye ki tum wajh be-wajh muskurao

aur uljhanon aur bakheDon mein paDe man bap ko muskurane par majbur kar do

pyare laDko pata hai KHuda ne tumhein kyun banaya hai

is liye ki tum har har us muhim mein be-KHatar kud paDo jo baDe sar karna chahte the

lekin buz-dili ya KHauf ki wajh se na kar sake

pyari laDkiyo pata hai KHuda ne tumhein kyun banaya hai

is liye ki tum zindagi ka daman husn-e-do-alam se bhar do

aur viranon mein bhi qadam rakho to wahan chupke se bahaar aa jae

pyari aurto pata hai KHuda ne tumhein kyun banaya hai

is liye ki tum mohabbat ke jadu se zamin ke sine ko pak kar do

nafrat se nifaq se na-umidi hai

pyare mardo pata hai KHuda ne tumhein kyun banaya hai

is liye ki tum hathon mein hath Dal kar aur saron se sar joD kar hifazat karo

amn ki aazadi ki insaf ki

pyare buzurgo pata hai KHuda ne tumhein kyun banaya hai

is liye ki tum kaT sako jo tum ne boya tha

aur aane wali naslon ko munh bhar ke bata sako ki unhen kya bona chahiye