jhuT aur sach ke tamashe

zarā dekh mere muqaddar kī shāḳhoñ pe

jitne shagūfe the

sab jal ga.e haiñ

mire raḳht-e-jāñ par

bahāroñ kā zāmin

koī gul nahīñ hai

zarā yaad kar jab

tirī ḳhush-bayānī ne

jhuuT aur sach ke tamāshe meñ

merī zabāñ kaaT dī thī

vo din shauq-e-parvāz meñ jab

tire bāzuoñ ne

mirī shāḳh-e-jāñ kaaT dī thī

tire marmarīñ qasr ke sañg-e-buniyād meñ

merā ḳhuuñ hai

tire ba.ad barsoñ

tamāzat meñ chal chal ke mere qadam

thak ga.e haiñ

jabhī yaḳh-kade meñ bhī to be-sukūñ hai

masīhā.ī ke zo.am meñ jitne nashtar

tire haath se

merī rag rag meñ utre

sabhī par tirā ḳhuuñ mire ḳhuuñ

ke dhabboñ se lipTā huā hai

mirī qat.a-e-jāñ hī se terī numū hai

magar ye bhī sach hai

tirī aabrū hī mirī aabrū hai

tirā haal merī nazar se ayaañ hai

ki tū merī jaañ hai

zara dekh mere muqaddar ki shaKHon pe

jitne shagufe the

sab jal gae hain

mere raKHt-e-jaan par

bahaaron ka zamin

koi gul nahin hai

zara yaad kar jab

teri KHush-bayani ne

jhuT aur sach ke tamashe mein

meri zaban kaT di thi

wo din shauq-e-parwaz mein jab

tere bazuon ne

meri shaKH-e-jaan kaT di thi

tere marmarin qasr ke sang-e-buniyaad mein

mera KHun hai

tere baad barson

tamazat mein chal chal ke mere qadam

thak gae hain

jabhi yaKH-kade mein bhi to be-sukun hai

masihai ke zoam mein jitne nashtar

tere hath se

meri rag rag mein utre

sabhi par tera KHun mere KHun

ke dhabbon se lipTa hua hai

meri qata-e-jaan hi se teri numu hai

magar ye bhi sach hai

teri aabru hi meri aabru hai

tera haal meri nazar se ayan hai

ki tu meri jaan hai