jibrail-o-iblis
Interesting Fact
(Bal-e-Jibril)
jibra.īl
hamdam-e-dairīna kaisā hai jahān-e-rañg-o-bū
iblīs
soz-o-sāz o dard o daaġh o justujū o aarzū
jibra.īl
har ghaḌī aflāk par rahtī hai terī guftugū
kyā nahīñ mumkin ki terā chaak dāman ho rafū
iblīs
aah ai jibrīl tū vāqif nahīñ is raaz se
kar gayā sarmast mujh ko TuuT kar merā subū
ab yahāñ merī guzar mumkin nahīñ mumkin nahīñ
kis qadar ḳhāmosh hai ye ālam-e-be-Kāḳh-o-kū
jis kī naumīdī se ho soz-e-darūn-e-kā.enāt
us ke haq meñ taqnatū achchhā hai yā lā-taqnatū
jibra.īl
kho diye inkār se tū ne maqāmāt-e-buland
chashm-e-yazdāñ meñ farishtoñ kī rahī kyā aabrū
iblīs
hai mirī jur.at se musht-e-ḳhāk meñ zauq-e-numū
mere fitne jāma-e-aql-o-ḳhirad kā tār-o-pū
dekhtā hai tū faqat sāhil se razm-e-ḳhair-o-shar
kaun tūfāñ ke tamāñche khā rahā hai maiñ ki tū
ḳhizr bhī be-dast-o-pā ilyās bhī be-dast-o-pā
mere tūfāñ yam-ba-yam dariyā-ba-dariyā jū-ba-jū
gar kabhī ḳhalvat mayassar ho to pūchh allāh se
qissa-e-ādam ko rañgīñ kar gayā kis kā lahū
maiñ khaTaktā huuñ dil-e-yazdāñ meñ kāñTe kī tarah
tū faqat allāh-hū allāh-hū allāh-hū
jibrail
hamdam-e-dairina kaisa hai jahan-e-rang-o-bu
iblis
soz-o-saz o dard o dagh o justuju o aarzu
jibrail
har ghaDi aflak par rahti hai teri guftugu
kya nahin mumkin ki tera chaak daman ho rafu
iblis
aah ai jibril tu waqif nahin is raaz se
kar gaya sarmast mujh ko TuT kar mera subu
ab yahan meri guzar mumkin nahin mumkin nahin
kis qadar KHamosh hai ye aalam-e-be-KaKH-o-ku
jis ki naumidi se ho soz-e-darun-e-kaenat
us ke haq mein taqnatu achchha hai ya la-taqnatu
jibrail
kho diye inkar se tu ne maqamat-e-buland
chashm-e-yazdan mein farishton ki rahi kya aabru
iblis
hai meri jurat se musht-e-KHak mein zauq-e-numu
mere fitne jama-e-aql-o-KHirad ka tar-o-pu
dekhta hai tu faqat sahil se razm-e-KHair-o-shar
kaun tufan ke tamanche kha raha hai main ki tu
KHizr bhi be-dast-o-pa ilyas bhi be-dast-o-pa
mere tufan yam-ba-yam dariya-ba-dariya ju-ba-ju
gar kabhi KHalwat mayassar ho to puchh allah se
qissa-e-adam ko rangin kar gaya kis ka lahu
main khaTakta hun dil-e-yazdan mein kanTe ki tarah
tu faqat allah-hu allah-hu allah-hu
This content features in following collection(s)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
