jihat ki talash

yahāñ daraḳht ke uupar ugā huā hai daraḳht

zamīn tañg hai (jaise kabhī farāḳh na thii)

havā kā kaal paḌā hai, namī bhī aam nahīñ

samundaroñ ko bilo kar fazāoñ ko math kar

janam diye haiñ agar chand abr ke TukḌe

jhapaT liyā hai unheñ yuuñ darāz shāḳhoñ ne

ki nīm-jāñ tane ko zarā ḳhabar na huī

jaḌeñ bhī ḳhaak tale ek hī lagan meñ ravāñ

na tīrgī se mafar hai, na raushnī kā savāl

zamīñ meñ paañv dhañse haiñ fazā meñ haat buland

na.ī jihat kā lage ab daraḳht meñ paivand

yahan daraKHt ke upar uga hua hai daraKHt

zamin tang hai (jaise kabhi faraKH na thi)

hawa ka kal paDa hai, nami bhi aam nahin

samundaron ko bilo kar fazaon ko math kar

janam diye hain agar chand abr ke TukDe

jhapaT liya hai unhen yun daraaz shaKHon ne

ki nim-jaan tane ko zara KHabar na hui

jaDen bhi KHak tale ek hi lagan mein rawan

na tirgi se mafar hai, na raushni ka sawal

zamin mein panw dhanse hain faza mein hat buland

nai jihat ka lage ab daraKHt mein paiwand