jis roz qaza aaegi

kis tarah aa.egī jis roz qazā aa.egī

shāyad is tarah ki jis taur kabhī avval-e-shab

be-talab pahle-pahal marhamat-e-bosa-e-lab

jis se khulne lageñ har samt tilismāt ke dar

aur kahīñ duur se anjān gulāboñ kī bahār

yak-ba-yak sīna-e-mahtāb ko taḌpāne lage

shāyad is tarah ki jis taur kabhī āḳhir-e-shab

nīm-vā kaliyoñ se sarsabz sahar

yak-ba-yak hujra-e-mahbūb meñ lahrāne lage

aur ḳhāmosh darīchoñ se ba-hañgām-e-rahīl

jhanjhanāte hue tāroñ kī sadā aane lage

kis tarah aa.egī jis roz qazā aa.egī

shāyad is tarah ki jis taur tah-e-nok-e-sināñ

koī rag vāhima-e-dard se chillāne lage

aur qazzāq-e-sināñ-dast kā dhundlā saaya

az-karāñ-tā-ba-karāñ dahr pe mañDlāne lage

kis tarah aa.egī jis roz qazā aa.egī

ḳhvāh qātil kī tarah aa.e ki mahbūb-sifat

dil se bas hogī yahī harf-e-vidā.a kī sūrat

lillāhil-hamd ba-anjām-e-dil-e-dil-zadagāñ

kalma-e-shukr ba-nām-e-lab-e-shīrīñ-dahanāñ

kis tarah aaegi jis roz qaza aaegi

shayad is tarah ki jis taur kabhi awwal-e-shab

be-talab pahle-pahal marhamat-e-bosa-e-lab

jis se khulne lagen har samt tilismat ke dar

aur kahin dur se anjaan gulabon ki bahaar

yak-ba-yak sina-e-mahtab ko taDpane lage

shayad is tarah ki jis taur kabhi aaKHir-e-shab

nim-wa kaliyon se sarsabz sahar

yak-ba-yak hujra-e-mahbub mein lahrane lage

aur KHamosh darichon se ba-hangam-e-rahil

jhanjhanate hue taron ki sada aane lage

kis tarah aaegi jis roz qaza aaegi

shayad is tarah ki jis taur tah-e-nok-e-sinan

koi rag wahima-e-dard se chillane lage

aur qazzaq-e-sinan-dast ka dhundla saya

az-karan-ta-ba-karan dahr pe manDlane lage

kis tarah aaegi jis roz qaza aaegi

KHwah qatil ki tarah aae ki mahbub-sifat

dil se bas hogi yahi harf-e-widaa ki surat

lillahil-hamd ba-anjam-e-dil-e-dil-zadagan

kalma-e-shukr ba-nam-e-lab-e-shirin-dahanan