jism ke us par

añdhere kamre meñ baiThā huuñ

ki bhūlī-bhaTkī koī kiran aa ke dekh paa.e

magar sadā se añdhere kamre kī rasm hai koī bhī kiran aa ke dekh paa.e

bhalā ye kyuuñ ho

koī kiran is ko dekh paa.e to us ghaḌī se

añdherā kamra añdherā nahīñ rahegā

vo TuuT kar tīrgī kā ik sail-e-be-karāñ ban ke bah uThegā

aur us ghaḌī se is ujāle kā koī maḳhzan bhī rok paa.e bhalā ye kyuuñ ho

hazār sāloñ ke fāsle se ye kah rahā huuñ

hazāroñ sāloñ ke fāsle se magar koī is ko sun rahā hai ye kaun jaane

siyāh bāloñ kī tīrgī meñ tumhārā māthā chamak rahā hai

tumhārī āñkhoñ meñ ik kiran naach naach kar mujh se kah rahī hai

ki mere hoñToñ meñ hai vo amrit

hazāroñ sāloñ ke fāsle se jo ris rahā hai

magar ye sab saal nuur ke saal to nahīñ tīrgī ke bhī saal ye nahīñ haiñ

ye saal to fāsle kī pechīda silvaTeñ haiñ

añdherā kamra añdherā kyuuñ hai

tumhāre bāloñ kī tīrgī maiñ nigāh gum hai

ye band juuḌā jo khul ke bikhre to phir kiran bhī sañvar ke nikhre

tumhārā malbūs ik sapīdī pe dhāriyoñ se sujhā rahā hai

añdhere kamre meñ jab kiran aa.ī tīrgī dhāriyāñ banegī

aur us kiran se añdherā pal-bhar ujālā ban kar pukār uThegā

ki bhūlī-bhaTkī yahāñ kabhī tīrgī bhī aa.e

hazāroñ sāloñ kā fāsla tīrgī banā hai

tumhāre hoñToñ pe giit ke phuul muskurā.e ki tum ne apne libās ko yuuñ utaar pheñkā

ki jaise raagī ne taan lī ho

tumhārī har taan tīrgī kī siyāh dhārā banī huī hai

koī kiran is se phuuT paa.e bhalā ye kyuuñ ho

siyāh kamra tumhārī tānoñ se gūñjtā hai

hazāroñ sāloñ se gūñjtā hai

siyāh kamra tumhāre bāloñ kī tīrgī se chamak rahā hai

siyāh kamra libās kī har achhūtī karvaT se kah rahā hai

yahāñ tum aao yahāñ koī tum ko dekh paa.e nahīñ ye mumkin

yahāñ kiran aa.ī to vo fauran añdhere kamre meñ jā chhupegī

aur us pe dhārā libās kī yuuñ bahegī jaise

añdherā kamra añdherā kamra kabhī nahīñ thā

vo ik kiran thī

andhere kamre mein baiTha hun

ki bhuli-bhaTki koi kiran aa ke dekh pae

magar sada se andhere kamre ki rasm hai koi bhi kiran aa ke dekh pae

bhala ye kyun ho

koi kiran is ko dekh pae to us ghaDi se

andhera kamra andhera nahin rahega

wo TuT kar tirgi ka ek sail-e-be-karan ban ke bah uThega

aur us ghaDi se is ujale ka koi maKHzan bhi rok pae bhala ye kyun ho

hazar salon ke fasle se ye kah raha hun

hazaron salon ke fasle se magar koi is ko sun raha hai ye kaun jaane

siyah baalon ki tirgi mein tumhaara matha chamak raha hai

tumhaari aankhon mein ek kiran nach nach kar mujh se kah rahi hai

ki mere honTon mein hai wo amrit

hazaron salon ke fasle se jo ris raha hai

magar ye sab sal nur ke sal to nahin tirgi ke bhi sal ye nahin hain

ye sal to fasle ki pechida silwaTen hain

andhera kamra andhera kyun hai

tumhaare baalon ki tirgi main nigah gum hai

ye band juDa jo khul ke bikhre to phir kiran bhi sanwar ke nikhre

tumhaara malbus ek sapidi pe dhaariyon se sujha raha hai

andhere kamre mein jab kiran aai tirgi dhaariyan banegi

aur us kiran se andhera pal-bhar ujala ban kar pukar uThega

ki bhuli-bhaTki yahan kabhi tirgi bhi aae

hazaron salon ka fasla tirgi bana hai

tumhaare honTon pe git ke phul muskurae ki tum ne apne libas ko yun utar phenka

ki jaise ragi ne tan li ho

tumhaari har tan tirgi ki siyah dhaara bani hui hai

koi kiran is se phuT pae bhala ye kyun ho

siyah kamra tumhaari tanon se gunjta hai

hazaron salon se gunjta hai

siyah kamra tumhaare baalon ki tirgi se chamak raha hai

siyah kamra libas ki har achhuti karwaT se kah raha hai

yahan tum aao yahan koi tum ko dekh pae nahin ye mumkin

yahan kiran aai to wo fauran andhere kamre mein ja chhupegi

aur us pe dhaara libas ki yun bahegi jaise

andhera kamra andhera kamra kabhi nahin tha

wo ek kiran thi