jo hum pe guzri

log kahte haiñ ki gulshan meñ bahār aa.ī thī

bāġhbāñ ne gul-e-ḳhandāñ kī qasam khaa.ī thī

ik na.e daur ke āġhāz kā dilkash naġhma

gungunā.ī thī zabāñ vaqt kī mub.ham dhun meñ

log kahte haiñ ki ik sub.h-e-tarab aa.ī thī

apnī āġhosh meñ fardā kā fusūñ laa.ī thī

log kahte the ki ab mai-kada-e-hastī meñ

koī shākī na rahegā kisī mastāne se

tishna-kāmī kī shikāyat na karegā koī

yuuñ badal jā.egā maiḳhāne kā dastūr-e-kuhan

ab tahī jām-o-subū kī na hikāyat hogī

naġhma-zan qismat-e-arbāb-e-mohabbat hogī

log kahte haiñ ki taz.īn-e-chaman ho bhī chukī

rasm-e-ārā.ish-e-ruḳhsār-o-dahan ho bhī chukī

shāna dar gesū-e-lailā-e-vatan ho bhī chukā

dast-e-imroz se maazī kā kafan sil bhī chukā

qāfile manzil-e-maqsūd ko jā pahuñche haiñ

marhale qurb-e-lab-e-yār ke aa pahuñche haiñ

zindagī phir bhī pareshāñ sī nazar aatī hai

azmat-e-husn pashemāñ sī nazar aatī hai

dekh kar ḳhalvat-e-hastī kī ḳhamoshī yaaro

maut angusht-ba-dandāñ sī nazar aatī hai

shiddat-e-dard kā ehsās sivā hai ab bhī

sham-e-ġham aur farozāñ sī nazar aatī hai

ġhāza-e-gul liye ruḳhsār-e-ḳhizāñ aaj bhī hai

andalīboñ kā vahī tarz-e-fuġhāñ aaj bhī hai

sham.a-e-be-nūr yaqīñ tā-ba-sahar jaltī hai

ziist sharminda-e-sāhab-nazarāñ aaj bhī hai

zehn-e-mashriq pe vahī ḳhvāb-e-girāñ aaj bhī hai

chashm-e-maġhrib ba-hiqārat nigarāñ aaj bhī hai

aaj to vo bhī pashemāñ se nazar aate haiñ

jin ke kānoñ ne na.e daur ke naġhmāt sune

jin kī āñkhoñ ne na.ī sub.h ke jalve dekhe

jin ke hoñToñ pe guhar-bār tabassum machle

ye fareb-e-rah-e-mub.ham kī shikasta dīvār

kab talak qasr-e-taqaddus ko sahārā degī

ye tilism-e-shab-e-bīmār rahegā kab tak

ḳhūñ-fishāñ dīda-e-bedār rahegā kab tak

log kahte hain ki gulshan mein bahaar aai thi

baghban ne gul-e-KHandan ki qasam khai thi

ek nae daur ke aaghaz ka dilkash naghma

gungunai thi zaban waqt ki mubham dhun mein

log kahte hain ki ek subh-e-tarab aai thi

apni aaghosh mein farda ka fusun lai thi

log kahte the ki ab mai-kada-e-hasti mein

koi shaki na rahega kisi mastane se

tishna-kaami ki shikayat na karega koi

yun badal jaega maiKHane ka dastur-e-kuhan

ab tahi jam-o-subu ki na hikayat hogi

naghma-zan qismat-e-arbab-e-mohabbat hogi

log kahte hain ki tazin-e-chaman ho bhi chuki

rasm-e-araish-e-ruKHsar-o-dahan ho bhi chuki

shana dar gesu-e-laila-e-watan ho bhi chuka

dast-e-imroz se mazi ka kafan sil bhi chuka

qafile manzil-e-maqsud ko ja pahunche hain

marhale qurb-e-lab-e-yar ke aa pahunche hain

zindagi phir bhi pareshan si nazar aati hai

azmat-e-husn pasheman si nazar aati hai

dekh kar KHalwat-e-hasti ki KHamoshi yaro

maut angusht-ba-dandan si nazar aati hai

shiddat-e-dard ka ehsas siwa hai ab bhi

sham-e-gham aur farozan si nazar aati hai

ghaza-e-gul liye ruKHsar-e-KHizan aaj bhi hai

andalibon ka wahi tarz-e-fughan aaj bhi hai

shama-e-be-nur yaqin ta-ba-sahar jalti hai

zist sharminda-e-sahab-nazaran aaj bhi hai

zehn-e-mashriq pe wahi KHwab-e-giran aaj bhi hai

chashm-e-maghrib ba-hiqarat nigaran aaj bhi hai

aaj to wo bhi pasheman se nazar aate hain

jin ke kanon ne nae daur ke naghmat sune

jin ki aankhon ne nai subh ke jalwe dekhe

jin ke honTon pe guhar-bar tabassum machle

ye fareb-e-rah-e-mubham ki shikasta diwar

kab talak qasr-e-taqaddus ko sahaara degi

ye tilism-e-shab-e-bimar rahega kab tak

KHun-fishan dida-e-bedar rahega kab tak