jokham

jab kabhī maiñ apnī koī

purānī likhī nazm uThā.ūñ

to vo kuchh badlī badlī sī lagtī hai

use jitnī baar paḌho utnī hī baar

merī raa.e us ke baare meñ badalne lagtī hai

ki kabhī nazm jī ko achchhī lagtī hai

to kabhī akhartī hai

kabhī chehre pe muskān to kabhī māthe pe shikan

aane lagtī hai

is uljhan kā kyā koī hal hai

kyā maiñ apne qalam pe bharosa kar

apnī chintāon ko nazar-andāz kar

apnī nazmeñ duniyā ke havāle kar saktā huuñ

kyā maiñ ye jokham le saktā huuñ

natīja kuchh bhī ho

motī kī talāsh meñ samundar kī gahrā.iyoñ meñ

ġhota-ḳhor jaane se ḳhud ko rok nahīñ saktā

bārish ho na ho fasl uge na uge

kisān bovā.ī karnā hal chalānā chhoḌ nahīñ saktā

agar ġhaur kiyā jaa.e

to jokham vo mol le rahā hai

jo merī nazmeñ paḌhne vaalā hai

jab kabhi main apni koi

purani likhi nazm uThaun

to wo kuchh badli badli si lagti hai

use jitni bar paDho utni hi bar

meri rae us ke bare mein badalne lagti hai

ki kabhi nazm ji ko achchhi lagti hai

to kabhi akharti hai

kabhi chehre pe muskan to kabhi mathe pe shikan

aane lagti hai

is uljhan ka kya koi hal hai

kya main apne qalam pe bharosa kar

apni chintaon ko nazar-andaz kar

apni nazmen duniya ke hawale kar sakta hun

kya main ye jokham le sakta hun

natija kuchh bhi ho

moti ki talash mein samundar ki gahraiyon mein

ghota-KHor jaane se KHud ko rok nahin sakta

barish ho na ho fasl uge na uge

kisan bowai karna hal chalana chhoD nahin sakta

agar ghaur kiya jae

to jokham wo mol le raha hai

jo meri nazmen paDhne wala hai