judai

shajar hajar pe haiñ ġham kī ghaTā.eñ chhā.ī huī

subuk-ḳhirām havāoñ ko niiñd aa.ī huī

rageñ zamīñ ke manāzir kī paḌ chalīñ Dhīlī

ye ḳhasta-hālī ye darmāndagī ye sannāTā

fazā-e-nīm-shabī bhī hai sansanāī huī

dhuāñ dhuāñ se manāzir haiñ shabnamistāñ ke

sayyāra raat kī zulfeñ haiñ rasmasā.ī huī

ye rañg tāroñ bharī raat ke tanaffus kā

ki bū-e-dard meñ har saañs hai basā.ī huī

ḳhunuk udaas fazāoñ kī āñkhoñ meñ aañsū

tire firāq kī ye Tiis hai uThā.ī huī

sukūt-e-nīm-shabī gahrā hotā jaatā hai

rageñ haiñ sīna-e-hastī kī tilmilā.ī huī

hai aaj sāz-e-navā-hā-e-ḳhūñ-chakāñ ai dost

hayāt terī judā.ī kī choT khaa.ī huī

mirī in āñkhoñ se ab niiñd parda kartī hai

jo tere panja-e-rañgīñ kī thiiñ jagā.ī huī

sarishk paale hue tere narm dāman ke

nashāt tere tabassum se jagmagā.ī huī

laTak vo gesuoñ kī jaise pech-o-tāb-e-kamand

lachak bhavoñ kī vo jaise kamāñ jhukā.ī huī

sahar kā jaise tabassum damak vo māthe kī

kiran suhāg kī biñdī kī lahlahā.ī huī

vo añkhḌiyoñ kā fusūñ ruup kī vo deviyyat

vo siina rūh-e-numū jis meñ kanmanā.ī huī

vo sej saañs kī ḳhushbū ko jis pe niiñd aa.e

vo qad gulāb kī ik shāḳh lahlahā.ī huī

vo jhilmilāte sitāre tire pasīne ke

jabīn-e-shām-e-javānī thī jagmagā.ī huī

ho jaise but-kada aazar kā bol uThne ko

vo koī baat sī goyā laboñ tak aa.ī huī

vo dhaj vo dilbarī vo kām-rūp āñkhoñ kā

sajal adāoñ meñ vo rāgnī rachā.ī huī

ho ḳhvāb-gāh meñ sho.aloñ kī karvaTeñ dam-e-sub.h

vo bhairvīñ tirī bedāriyoñ kī gaa.ī huī

vo muskurātī huī lutf-e-dīd kī sub.heñ

tirī nazar kī shuāoñ kī gudgudā.ī huī

lagī jo tere tasavvur ke narm sho.aloñ se

hayāt-e-ishq se us aañch kī tipā.ī huī

hanūz vaqt ke kānoñ meñ chahchahāhaT hai

vo chaap tere qadam kī sunī-sunā.ī huī

hanūz sīna-e-māzī meñ jagmagāhaT hai

damakte ruup kī dīpāvlī jalā.ī huī

lahū meñ Duubī umañgoñ kī maut rok zarā

harīm-e-dil meñ chalī aatī hai DhiTā.ī huī

rahegī yaad javāñ-bevgī mohabbat kī

suhāg raat kī vo chūḌiyāñ baḌhā.ī huī

ye merī pahlī mohabbat na thī magar ai dost

ubhar ga.ī haiñ vo choTeñ dabī-dabā.ī huī

supurdagī o ḳhulūs-e-nihāñ ke parde meñ

jo terī narm-nigāhī kī thiiñ bi.Thā.ī huī

uThā chukā huuñ maiñ pahle bhī hijr ke sadme

vo saañs dukhtī huī aañkh DabDabā.ī huī

ye hādsa hai ajab tujh ko pā ke kho denā

ye sāneha hai ġhazab terī yaad aa.ī huī

ajiib dard se koī pukārtā hai tujhe

galā rundhā huā āvāz thar tharrā.ī huī

kahāñ hai aaj tū ai rañg-o-nūr kī devī

añdherī hai mirī duniyā luTī-luTā.ī huī

pahuñch sakegī bhī tujh tak mirī navā-e-firāq

jo kā.enāt ke ashkoñ meñ hai nahā.ī huī

shajar hajar pe hain gham ki ghaTaen chhai hui

subuk-KHiram hawaon ko nind aai hui

ragen zamin ke manazir ki paD chalin Dhili

ye KHasta-haali ye darmandagi ye sannaTa

faza-e-nim-shabi bhi hai sansanai hui

dhuan dhuan se manazir hain shabnamistan ke

sayyara raat ki zulfen hain rasmasai hui

ye rang taron bhari raat ke tanaffus ka

ki bu-e-dard mein har sans hai basai hui

KHunuk udas fazaon ki aankhon mein aansu

tere firaq ki ye Tis hai uThai hui

sukut-e-nim-shabi gahra hota jata hai

ragen hain sina-e-hasti ki tilmilai hui

hai aaj saz-e-nawa-ha-e-KHun-chakan ai dost

hayat teri judai ki choT khai hui

meri in aankhon se ab nind parda karti hai

jo tere panja-e-rangin ki thin jagai hui

sarishk pale hue tere narm daman ke

nashat tere tabassum se jagmagai hui

laTak wo gesuon ki jaise pech-o-tab-e-kamand

lachak bhawon ki wo jaise kaman jhukai hui

sahar ka jaise tabassum damak wo mathe ki

kiran suhag ki bindi ki lahlahai hui

wo ankhDiyon ka fusun rup ki wo dewiyyat

wo sina ruh-e-numu jis mein kanmanai hui

wo sej sans ki KHushbu ko jis pe nind aae

wo qad gulab ki ek shaKH lahlahai hui

wo jhilmilate sitare tere pasine ke

jabin-e-sham-e-jawani thi jagmagai hui

ho jaise but-kada aazar ka bol uThne ko

wo koi baat si goya labon tak aai hui

wo dhaj wo dilbari wo kaam-rup aankhon ka

sajal adaon mein wo ragni rachai hui

ho KHwab-gah mein shoalon ki karwaTen dam-e-subh

wo bhairwin teri bedariyon ki gai hui

wo muskuraati hui lutf-e-did ki subhen

teri nazar ki shuaon ki gudgudai hui

lagi jo tere tasawwur ke narm shoalon se

hayat-e-ishq se us aanch ki tipai hui

hanuz waqt ke kanon mein chahchahahaT hai

wo chap tere qadam ki suni-sunai hui

hanuz sina-e-mazi mein jagmagahaT hai

damakte rup ki dipawli jalai hui

lahu mein Dubi umangon ki maut rok zara

harim-e-dil mein chali aati hai DhiTai hui

rahegi yaad jawan-bewgi mohabbat ki

suhag raat ki wo chuDiyan baDhai hui

ye meri pahli mohabbat na thi magar ai dost

ubhar gai hain wo choTen dabi-dabai hui

supurdagi o KHulus-e-nihan ke parde mein

jo teri narm-nigahi ki thin biThai hui

uTha chuka hun main pahle bhi hijr ke sadme

wo sans dukhti hui aankh DabDabai hui

ye hadsa hai ajab tujh ko pa ke kho dena

ye saneha hai ghazab teri yaad aai hui

ajib dard se koi pukarta hai tujhe

gala rundha hua aawaz thar tharrai hui

kahan hai aaj tu ai rang-o-nur ki dewi

andheri hai meri duniya luTi-luTai hui

pahunch sakegi bhi tujh tak meri nawa-e-firaq

jo kaenat ke ashkon mein hai nahai hui