junun-e-wafa

vo ḳhaak bo.e the hālāt ne sharar jis meñ

ab us meñ phuul tamannā ke khilne vaale haiñ

hue the jin ke sabab chaak chaak sīna-e-dil

vo chaak ab unhīñ hāthoñ se silne vaale haiñ

jo dost uljhe the aapas meñ dushmanoñ kī tarah

phir ek baar vo aapas meñ milne vaale haiñ

dayār-e-rūs hamārā salām-e-jāñ ho qubūl

ki rāh-e-shauq ko āsāñ banā diyā tū ne

ye daur aaj kā to mojazoñ kā daur nahīñ

magar vo mo.ajaza ham ko dikhā diyā tū ne

ki jis se duur o qarīb ek nuur phail gayā

charāġh-e-kushta ko aise jalā diyā tū ne

ye tāshqand se paiġhām-e-dil-navāz aayā

ki ibtilā kā zamāna guzar gayā yāro!

bahut rahā jise da.avā-e-sāhil-e-āshūbī

sunā ye hai ki vo dariyā utar gayā yāro!

kuchh is tarah se kisī ne diyā lahū apnā

ki arz-e-sharq kā chehra nikhar gayā yāro!

vo ḳhaak jis pe mire rahnumā ne jaañ dī hai

mirā salām usī dil-navāz ḳhaak ke naam

navā-e-ḳhāma ho mansūb aaj se pyāro

shahīd-e-amn kī rūdād-e-tābnāk ke naam

mire junūn-e-vafā kā yahī payām hai aaj

suḳhnavarān-o-adībān-e-hind-o-pāk ke naam

wo KHak boe the haalat ne sharar jis mein

ab us mein phul tamanna ke khilne wale hain

hue the jin ke sabab chaak chaak sina-e-dil

wo chaak ab unhin hathon se silne wale hain

jo dost uljhe the aapas mein dushmanon ki tarah

phir ek bar wo aapas mein milne wale hain

dayar-e-rus hamara salam-e-jaan ho qubul

ki rah-e-shauq ko aasan bana diya tu ne

ye daur aaj ka to mojazon ka daur nahin

magar wo moajaza hum ko dikha diya tu ne

ki jis se dur o qarib ek nur phail gaya

charagh-e-kushta ko aise jala diya tu ne

ye tashqand se paigham-e-dil-nawaz aaya

ki ibtila ka zamana guzar gaya yaro!

bahut raha jise dawa-e-sahil-e-ashubi

suna ye hai ki wo dariya utar gaya yaro!

kuchh is tarah se kisi ne diya lahu apna

ki arz-e-sharq ka chehra nikhar gaya yaro!

wo KHak jis pe mere rahnuma ne jaan di hai

mera salam usi dil-nawaz KHak ke nam

nawa-e-KHama ho mansub aaj se pyaro

shahid-e-amn ki rudad-e-tabnak ke nam

mere junun-e-wafa ka yahi payam hai aaj

suKHnawaran-o-adiban-e-hind-o-pak ke nam