justuju

haqīqat kā taqāzā hai ho dil ko justujū pahle

husūl-e-mudda.ā ko chāhiye kuchh aarzū pahle

nigāheñ ḳhud hī ā.eñgī chaman meñ bahr-e-nazzāra

tire gulshan ke phūloñ meñ magar ho rañg-o-bū pahle

agar shīshe meñ sahbā hai to mai-kash mil hī jā.eñge

muhayyā mai-kade meñ chāhiye jām-o-subū pahle

samā jā.egā surma ban ke ḳhilqat kī nigāhoñ meñ

tū apnī zaat meñ paidā kare gar aabrū pahle

hare ho jā.eñge ik din tirī ummīd ke buuTe

chaman meñ āñsūoñ kī tū bahā de aabjū pahle

garebāñ chaak ho majnūñ-sifat gar shauq-e-lailā hai

phirā kar dasht-e-vahshat meñ misāl-e-qais tū pahle

ḳhudī ko gar miTā.egā ḳhudā bhī mil hī jā.egā

uThāyā chāhiye dil se hijāb-e-mā-o-tū pahle

zarūrī hai ki khul jaa.eñ qubūliyyat ke darvāze

duāoñ ko 'purī' dil se nikalne kī ho ḳhū pahle

haqiqat ka taqaza hai ho dil ko justuju pahle

husul-e-muddaa ko chahiye kuchh aarzu pahle

nigahen KHud hi aaengi chaman mein bahr-e-nazzara

tere gulshan ke phulon mein magar ho rang-o-bu pahle

agar shishe mein sahba hai to mai-kash mil hi jaenge

muhayya mai-kade mein chahiye jam-o-subu pahle

sama jaega surma ban ke KHilqat ki nigahon mein

tu apni zat mein paida kare gar aabru pahle

hare ho jaenge ek din teri ummid ke buTe

chaman mein aansuon ki tu baha de aabju pahle

gareban chaak ho majnun-sifat gar shauq-e-laila hai

phira kar dasht-e-wahshat mein misal-e-qais tu pahle

KHudi ko gar miTaega KHuda bhi mil hi jaega

uThaya chahiye dil se hijab-e-ma-o-tu pahle

zaruri hai ki khul jaen qubuliyyat ke darwaze

duaon ko 'puri' dil se nikalne ki ho KHu pahle