kaenati gard mein barsat ki ek sham

vaise to pahāḌ zamīn kā sukḌā huā libās haiñ

lekin jab bārish hotī hai

un kī silvaToñ par ujlāhaT ug aatī hai

saañp kī dum sī saḌak par chalte hue

mausam mujhe apnī kunDlī meñ qaid kar letā hai

lahr-dar-lahr munqasim pahāḌoñ kā husn

rañgoñ kī is dhuñdhlāhaT meñ poshīda hai

jise hamārī bīmār āñkheñ kabhī mun.akis nahīñ kar pātīñ

bārish ke ba.ad

jab dhartī apne maile kapḌe utārtī hai

maiñ har shām, rāzoñ ke ta.āqub meñ

us ke dā.ūdī badan par phail jaatā huuñ

aur dīvāreñ phalāñgtā, ḳhudā ke shikasta sahn meñ

naqab lagātā huuñ

mere vajūd meñ ek andhā ḳhalā phailne lagtā hai

maiñ dekhtā huuñ

āsmān meñ koī uqaab chhapā hai

jo hamārī zindagiyoñ ke chūze uchak rahā hai

maiñ un daraḳhtoñ se muḳhātab hotā huuñ

jin kī jaḌoñ meñ chyūñTiyāñ

apnī maut par sogvār rahtī haiñ

bhīgī shāḳhoñ par sahme kavve raat bhar kāñpte rahte haiñ

kitnī be-rahm lagtī hai zindagī!

jahāñ maut barastī hai

aur lākhoñ sāñseñ be-vaq.at āvāra kuttoñ kī tarah

mar jaatī haiñ

vahāñ phir muskurātā ghanā jañgal ug aatā hai

is lā-mutanāhī vus.at meñ ham sābun par chimTe baal se

zyāda kuchh nahīñ rahte

vaqt jise, eḌī par jame mel kī tarah dho Dāltā hai

maiñ apnī za.iif sciencī quvvat se mahsūs kartā huuñ

sab se aziim dukh yahī hai

ki kā.enāt hamārī dastaras meñ nahīñ

is rañjūrī safar se be-bas lauTte hue

maiñ jūtoñ se miTTī jhāḌtā huuñ

aur khiḌkī se jhāñkte ujle manzar meñ

be-fikrī kī chaa.e piine lagtā huuñ

duur pahāḌoñ par, musalsal bārish hotī rahtī hai

waise to pahaD zamin ka sukDa hua libas hain

lekin jab barish hoti hai

un ki silwaTon par ujlahaT ug aati hai

sanp ki dum si saDak par chalte hue

mausam mujhe apni kunDli mein qaid kar leta hai

lahr-dar-lahr munqasim pahaDon ka husn

rangon ki is dhundhlahaT mein poshida hai

jise hamari bimar aankhen kabhi munakis nahin kar patin

barish ke baad

jab dharti apne maile kapDe utarti hai

main har sham, raazon ke taaqub mein

us ke daudi badan par phail jata hun

aur diwaren phalangta, KHuda ke shikasta sahn mein

naqab lagata hun

mere wajud mein ek andha KHala phailne lagta hai

main dekhta hun

aasman mein koi uqab chhapa hai

jo hamari zindagiyon ke chuze uchak raha hai

main un daraKHton se muKHatab hota hun

jin ki jaDon mein chyunTiyan

apni maut par sogwar rahti hain

bhigi shaKHon par sahme kawwe raat bhar kanpte rahte hain

kitni be-rahm lagti hai zindagi!

jahan maut barasti hai

aur lakhon sansen be-waqat aawara kutton ki tarah

mar jati hain

wahan phir muskuraata ghana jangal ug aata hai

is la-mutanahi wusat mein hum sabun par chimTe baal se

zyaada kuchh nahin rahte

waqt jise, eDi par jame mel ki tarah dho Dalta hai

main apni zaif scienci quwwat se mahsus karta hun

sab se azim dukh yahi hai

ki kaenat hamari dastaras mein nahin

is ranjuri safar se be-bas lauTte hue

main juton se miTTi jhaDta hun

aur khiDki se jhankte ujle manzar mein

be-fikri ki chae pine lagta hun

dur pahaDon par, musalsal barish hoti rahti hai