kala phul

ghane bhayānak añdheroñ kī taheñ chiir kar

ik kaalā phuul nikal aayā hai

komal mulā.em nam pañkhuḌiyāñ

jaise us biptā kī maarī ke

āñsūoñ se tar gaal

jis kā patī ranbhūmī se nahīñ lauTā

chitā meñ jalte sandal kī sī mahak hai is meñ

sogvār dard kā paikar phuul

us kī ma.asūm rangat

suhānī ḳhushbū

kahāñ kho ga.ī

in Tahniyoñ shāḳhoñ ke bhītar

jīvan-ras ab bhī dauḌ rahā hai

lekin is meñ lahū kī milāvaT hai

un kā jo-yāñtsī aur huvāñ-ho

gangā aur jamunā ke maidānoñ se

apnī khetiyāñ khaliyān

biivī bachche ghar-bār

sab taj kar

in sunsān vahshat-nāk

himāliyā.ī barfānī sahrāoñ meñ aa.e

aur achānak maut ke shikanje meñ phañs ga.e

aur ab apne humakte bachchoñ ko

godiyoñ meñ khilāne

apnī chhoTī bahnoñ kā byaah rachāne

Dholak gītoñ ko sunñe

yahāñ se kabhī na vāpas jā.eñge

is dhartī meñ unhīñ kā ḳhuun jazb hai

aur ye kaalā phuul

shāyad duniyā ke sab se dard-angez alamiya kī nishānī hai

agar ye sach hai ki insān kī kahānī

aadam ke gunāh

aur hābīl ke hāthoñ qābīl ke qatl se

shurūa hotī hai

to ye gunāh aur jurm to

is se bhī baḌā hai

ki chīnī bhaa.ī hindostānī kā

hindostānī chīnī kā ḳhuun bahā.eñ

ye baat jhūTī nahīñ sachchī hai

hazār baar sau hazār baar

ki ham donoñ bhaa.ī bhaa.ī haiñ

aur jab lākhoñ karoḌoñ

ek arab insānoñ ne

hindī chīnī bhaa.ī bhaa.ī kā na.ara buland kiyā thā

to vo āvāz utnī hī sachchī thī

jitnī shākye munī kī vaanī

jo bhārat aur chiin

donoñ meñ gūñjī

aur jis ke jaadū se raakh sonā ban ga.ī

kyā krodh aur lobh

ghinā aur hinā ke upāsak

saty ko asaty sābit kar deñge

barbartā kī kaalī āñdhiyāñ

manushytā aur karunā kī

mash.aloñ ko bujhā deñgī

gāñdhī ko qatl kar do

lekin us kī mahān aatmā

sadā koh-e-nūr kī tarah

jagmagātī rahegī

ghane bhayanak andheron ki tahen chir kar

ek kala phul nikal aaya hai

komal mulaem nam pankhuDiyan

jaise us bipta ki mari ke

aansuon se tar gal

jis ka pati ranbhumi se nahin lauTa

chita mein jalte sandal ki si mahak hai is mein

sogwar dard ka paikar phul

us ki masum rangat

suhani KHushbu

kahan kho gai

in Tahniyon shaKHon ke bhitar

jiwan-ras ab bhi dauD raha hai

lekin is mein lahu ki milawaT hai

un ka jo-yantsi aur huwan-ho

ganga aur jamuna ke maidanon se

apni khetiyan khaliyan

biwi bachche ghar-bar

sab taj kar

in sunsan wahshat-nak

himaliyai barfani sahraon mein aae

aur achanak maut ke shikanje mein phans gae

aur ab apne humakte bachchon ko

godiyon mein khilane

apni chhoTi bahnon ka byah rachane

Dholak giton ko sunne

yahan se kabhi na wapas jaenge

is dharti mein unhin ka KHun jazb hai

aur ye kala phul

shayad duniya ke sab se dard-angez alamiya ki nishani hai

agar ye sach hai ki insan ki kahani

aadam ke gunah

aur habil ke hathon qabil ke qatl se

shurua hoti hai

to ye gunah aur jurm to

is se bhi baDa hai

ki chini bhai hindostani ka

hindostani chini ka KHun bahaen

ye baat jhuTi nahin sachchi hai

hazar bar sau hazar bar

ki hum donon bhai bhai hain

aur jab lakhon karoDon

ek arab insanon ne

hindi chini bhai bhai ka nara buland kiya tha

to wo aawaz utni hi sachchi thi

jitni shakye muni ki wani

jo bhaarat aur chin

donon mein gunji

aur jis ke jadu se rakh sona ban gai

kya krodh aur lobh

ghina aur hina ke upasak

saty ko asaty sabit kar denge

barbarta ki kali aandhiyan

manushyta aur karuna ki

mashalon ko bujha dengi

gandhi ko qatl kar do

lekin us ki mahan aatma

sada koh-e-nur ki tarah

jagmagati rahegi