kali-das

jahān-e-ilm ko taslīm hai vaqār tirā

adab ke phūloñ se dāman hai lāla-zār tirā

chaman meñ yuuñ to bahār aatī jaatī rahtī hai

magar suḳhan kā hai gulshan sadā-bahār tirā

jamāl-e-husn kī duniyā meñ kho gayā hai vo

paḌhā kalām hai jis ne bhī ek baar tirā

nazar-faroz vo ma.anī vo dil-kushā alfāz

ki hai bayāz kā har saf.ha zar-nigār tirā

tirī nazīr nahīñ rif.at-e-taḳhayyul meñ

suḳhan hai arsh-e-mua.allā se ham-kanār tirā

tuyūr-o-vahshī-o-insān-o-fitrat-e-rañgīñ

tire kalām meñ yaksāñ hai sab se pyaar tirā

khulā varaq thā dil insān kā tire aage

hai tarjumānī-e-jazbāt shāhkār tirā

nashāt-e-vasl hai hāsil tire fasānoñ meñ

isī tarāne se hai saaz naġhma-bār tirā

vo tarjumānī-e-tahzīb-e-hind kī tū ne

ki yādgār-e-zamāna hai rozgār terā

diyā hai shakespeare ko maqām maġhrib ne

hai gosha gosha-e-ālam meñ haq-guzār tirā

sharāb-e-husn luTā.ī hai tū ne ḳhum ke ḳhum

rahegā kaif se sarshār bāda-ḳhvār tirā

hai tere naġhmoñ kā shaidā 'habīb' muddat se

isī sharāb meñ hai mast bāda-ḳhvār tirā

jahan-e-ilm ko taslim hai waqar tera

adab ke phulon se daman hai lala-zar tera

chaman mein yun to bahaar aati jati rahti hai

magar suKHan ka hai gulshan sada-bahaar tera

jamal-e-husn ki duniya mein kho gaya hai wo

paDha kalam hai jis ne bhi ek bar tera

nazar-faroz wo mani wo dil-kusha alfaz

ki hai bayaz ka har safha zar-nigar tera

teri nazir nahin rifat-e-taKHayyul mein

suKHan hai arsh-e-mualla se ham-kanar tera

tuyur-o-wahshi-o-insan-o-fitrat-e-rangin

tere kalam mein yaksan hai sab se pyar tera

khula waraq tha dil insan ka tere aage

hai tarjumani-e-jazbaat shahkar tera

nashat-e-wasl hai hasil tere fasanon mein

isi tarane se hai saz naghma-bar tera

wo tarjumani-e-tahzib-e-hind ki tu ne

ki yaadgar-e-zamana hai rozgar tera

diya hai shakespeare ko maqam maghrib ne

hai gosha gosha-e-alam mein haq-guzar tera

sharab-e-husn luTai hai tu ne KHum ke KHum

rahega kaif se sarshaar baada-KHwar tera

hai tere naghmon ka shaida 'habib' muddat se

isi sharab mein hai mast baada-KHwar tera