kanha tumhaari yaad mein hun be-qarar main

kānhā tumhārī yaad meñ huuñ be-qarār maiñ

kartī huuñ lamha lamha faqat intizār maiñ

kah kar ga.e the aaoge tum jald lauT kar

aa kar karoge ḳhatm ye tanhā.ī kā safar

kyā gopiyoñ ke saath meñ dil ko lagā liyā

kyā rukmanī ke saath ne sab kuchh bhulā diyā

kyā tum ko merī yaad bhī aatī nahīñ kabhī

furqat ye merī tum ko rulātī nahīñ kabhī

is dil meñ chāhatoñ kī tamannā liye hue

phirtī huuñ vo tumhārā dilāsa liye hue

bechain kis qadar huuñ tumhāre firāq meñ

jaltī ho sham.a jaise umīdoñ ke taak meñ

is ahd ke hī ba.ad se aashā ho tum mirī

jab se kahā thā tum ne ki rādhā ho tum mirī

tum ko qasam hai merī nā itnā rulāo tum

jitnā bhī jald ho sake bas lauT aao tum

kanha tumhaari yaad mein hun be-qarar main

karti hun lamha lamha faqat intizar main

kah kar gae the aaoge tum jald lauT kar

aa kar karoge KHatm ye tanhai ka safar

kya gopiyon ke sath mein dil ko laga liya

kya rukmani ke sath ne sab kuchh bhula diya

kya tum ko meri yaad bhi aati nahin kabhi

furqat ye meri tum ko rulati nahin kabhi

is dil mein chahaton ki tamanna liye hue

phirti hun wo tumhaara dilasa liye hue

bechain kis qadar hun tumhaare firaq mein

jalti ho shama jaise umidon ke tak mein

is ahd ke hi baad se aasha ho tum meri

jab se kaha tha tum ne ki radha ho tum meri

tum ko qasam hai meri na itna rulao tum

jitna bhi jald ho sake bas lauT aao tum