kar-e-nau

kuchh intizār aur karo sabr-e-nāgavār aur karo

kuchh apne saroñ ko qalam garebāñ ko chaak aur karo

apne andar kī garmī-e-ḳhūñ sambhāl kar rakkho

añdheroñ meñ saḳht pahroñ meñ zarā ye jaur aur saho

fazā palaTne meñ jaur thamne meñ vaqt hai shāyad

sub.h hone meñ vaqt hai yā sirf aisā lagtā hai

dard siine meñ uTh uTh ke nākāmiyoñ ko rotā hai

saañs barf ban kar ke dhamniyoñ meñ bahtī hai

apnī qismat pe hālat pe dam nikaltā hai

vo ghaḌī hai ki aao socheñ ki kyuuñ huā aisā

ye bhī mumkin hai ki fazā palaT na sake

sub.h jo hotī dikhtī hai kabhī bhī ho na sake

hamārī maut se pahle hamārī sūrat badal na sake

hinā jo pattharoñ pe khiltī thī khil na sake

agar ye yuuñ hai to kyā us kī zimmedārī apnī hai

ham devtā kā daano kā farq bhuul chuke haiñ

kaḌī davā kā mīThe zahr kā farq bhuul chuke haiñ

ham bhuul chuke haiñ daġhā ke muskurāte chehre ko

ham apnī zaat ke ta.hzīb-o-sanskār bhuul chuke haiñ

hamīñ jo ham nahīñ haiñ to ġhairoñ se kyā gila karnā

uTho ki ḳhud ko pahchāno apnā hausla joḌo

ye salāḳheñ ye beḌiyāñ ye hathkaḌī toḌo

ye buzdilī ye nākāmiyāñ ye naal chhoḌo

uTho sab saath mil ke yalġhār chheḌo

zamāna dekhnā tum ko phir se salām Thokegā

phir us ke baa'd sub.h ḳhud-ba-ḳhud tulūa hogī

ye duniyā tumhāre sāmne phir se nigūñ hogī

fazā meñ chaar sū phir tairne lagegī ḳhush-hālī

aur na.e sire se tārīḳh-e-hind phir shurūa hogī

abhī bhī vaqt hai uTho kār-e-nau kī ibtidā kar deñ

kuchh intizar aur karo sabr-e-nagawar aur karo

kuchh apne saron ko qalam gareban ko chaak aur karo

apne andar ki garmi-e-KHun sambhaal kar rakkho

andheron mein saKHt pahron mein zara ye jaur aur saho

faza palaTne mein jaur thamne mein waqt hai shayad

subh hone mein waqt hai ya sirf aisa lagta hai

dard sine mein uTh uTh ke nakaamiyon ko rota hai

sans barf ban kar ke dhamniyon mein bahti hai

apni qismat pe haalat pe dam nikalta hai

wo ghaDi hai ki aao sochen ki kyun hua aisa

ye bhi mumkin hai ki faza palaT na sake

subh jo hoti dikhti hai kabhi bhi ho na sake

hamari maut se pahle hamari surat badal na sake

hina jo pattharon pe khilti thi khil na sake

agar ye yun hai to kya us ki zimmedari apni hai

hum dewta ka dano ka farq bhul chuke hain

kaDi dawa ka miThe zahr ka farq bhul chuke hain

hum bhul chuke hain dagha ke muskuraate chehre ko

hum apni zat ke tahzib-o-sanskar bhul chuke hain

hamin jo hum nahin hain to ghairon se kya gila karna

uTho ki KHud ko pahchano apna hausla joDo

ye salaKHen ye beDiyan ye hathkaDi toDo

ye buzdili ye nakaamiyan ye nal chhoDo

uTho sab sath mil ke yalghaar chheDo

zamana dekhna tum ko phir se salam Thokega

phir us ke ba'd subh KHud-ba-KHud tulua hogi

ye duniya tumhaare samne phir se nigun hogi

faza mein chaar su phir tairne lagegi KHush-haali

aur nae sire se tariKH-e-hind phir shurua hogi

abhi bhi waqt hai uTho kar-e-nau ki ibtida kar den