kar-nama

aziim kaam karūñ koī ek din sochā

ki rahtī duniyā meñ apnā bhī naam rah jaa.e

magar vo kaam ho kyā zehn meñ nahīñ aayā

payambarī to ziyāñ jaan kā hai daavā kyā

tū jaane suulī pe chaḌhnā ho yā chaleñ aare

ki zinda aag kī lapToñ kī nazr honā paḌe

ḳhayāl aayā funūn-e-latīfa Dheroñ haiñ

sanam-tarāshī hai naġhmagarī ki naqqāshī

ye sab hī dā.imī shohrat kā ik vasīla haiñ

magar na lafzoñ pe qudrat na rañg qaabū meñ

phir ik zariya siyāsat hai naam paane kā

alāva naam ke mohre banā ke logoñ ko

bisāt-e-arz pe shatranj khel sakte haiñ

magar ye fan bhī mirī dastaras se bāhar thā

phir aur kyā ho bahut kuchh ḳhayāl dauḌāyā

alāva in ke mujhe aur kuchh nahīñ sūjhā

zamāne baad samundar kināre baiThā thā

aziim shai hai samundar bhī mere dil ne kahā

vo kyā tarīqa ho maiñ is kā bhaag ban jā.ūñ

samajh meñ aayā nahīñ koī rāsta bhī jab

to jhunjhlā ke samundar meñ kar diyā peshāb

azim kaam karun koi ek din socha

ki rahti duniya mein apna bhi nam rah jae

magar wo kaam ho kya zehn mein nahin aaya

payambari to ziyan jaan ka hai dawa kya

tu jaane suli pe chaDhna ho ya chalen aare

ki zinda aag ki lapTon ki nazr hona paDe

KHayal aaya funun-e-latifa Dheron hain

sanam-tarashi hai naghmagari ki naqqashi

ye sab hi daimi shohrat ka ek wasila hain

magar na lafzon pe qudrat na rang qabu mein

phir ek zariya siyasat hai nam pane ka

alawa nam ke mohre bana ke logon ko

bisat-e-arz pe shatranj khel sakte hain

magar ye fan bhi meri dastaras se bahar tha

phir aur kya ho bahut kuchh KHayal dauDaya

alawa in ke mujhe aur kuchh nahin sujha

zamane baad samundar kinare baiTha tha

azim shai hai samundar bhi mere dil ne kaha

wo kya tariqa ho main is ka bhag ban jaun

samajh mein aaya nahin koi rasta bhi jab

to jhunjhla ke samundar mein kar diya peshab