karwan-e-hayat

ye kaun kahtā hai insāñ kā kārvān-e-hayāt

palaT ke aane ko hai be-gunāhī kī jānib

vahī gunāh vahī ma.asiyat vahī badbū

vahī hai dard vahī karvaTeñ vahī pahlū

vahī fasād vahī shar hī tamarrud hai

dimāġh-o-dil pe musallat vahī tashaddud hai

ye kaun kahtā hai insāñ kā kārvān-e-hayāt

palaT ke aane ko hai be-gunāhī kī jānib

maiñ dekhtā huuñ ki insāñ kā kārvān-e-hayāt

ujālā chhoḌ chalā hai siyāhī kī jānib

siyāhī jaise samundar kī thaah meñ pinhāñ

siyāhī jaise ḳham-e-dūd-e-āh meñ pinhāñ

siyāhī jaise ghaTā-Top raat se zāhir

siyāhī jaise munāfiq kī baat se zāhir

maiñ dekhtā huuñ ki insāñ kā kārvān-e-hayāt

ujālā chhoḌ chalā hai siyāhī kī jānib

maiñ jāntā huuñ ki insāñ kā kārvān-e-hayāt

ravāñ-davāñ to hai lekin tabāhī kī jānib

tabāhī jis meñ jahannam kā ġhaar poshīda

tabāhī jis meñ hai har fard zahar-noshīda

tabāhī jis meñ hai har ghaat ghaat meñ jumūt

tabāhī jis meñ nihāñ maut kā jumūd-o-sukūt

maiñ jāntā huuñ ki insāñ kā kārvān-e-hayāt

ravāñ-davāñ to hai lekin tabāhī kī jānib

ye kaun kahta hai insan ka karwan-e-hayat

palaT ke aane ko hai be-gunahi ki jaanib

wahi gunah wahi masiyat wahi badbu

wahi hai dard wahi karwaTen wahi pahlu

wahi fasad wahi shar hi tamarrud hai

dimagh-o-dil pe musallat wahi tashaddud hai

ye kaun kahta hai insan ka karwan-e-hayat

palaT ke aane ko hai be-gunahi ki jaanib

main dekhta hun ki insan ka karwan-e-hayat

ujala chhoD chala hai siyahi ki jaanib

siyahi jaise samundar ki thah mein pinhan

siyahi jaise KHam-e-dud-e-ah mein pinhan

siyahi jaise ghaTa-Top raat se zahir

siyahi jaise munafiq ki baat se zahir

main dekhta hun ki insan ka karwan-e-hayat

ujala chhoD chala hai siyahi ki jaanib

main jaanta hun ki insan ka karwan-e-hayat

rawan-dawan to hai lekin tabahi ki jaanib

tabahi jis mein jahannam ka ghaar poshida

tabahi jis mein hai har fard zahar-noshida

tabahi jis mein hai har ghat ghat mein jumut

tabahi jis mein nihan maut ka jumud-o-sukut

main jaanta hun ki insan ka karwan-e-hayat

rawan-dawan to hai lekin tabahi ki jaanib