kash

kaash maiñ ek bāñsurī hotā

apne hoñToñ pe le ke koī mujhe

mere dil kī chhupī huī āvāz

saarī duniyā meñ muntashir kartā

aur phir giit meñ badal jaate

merī ma.asūm zindagī ke ḳhvāb

kaash hotā maiñ arsh kā mahtāb

apnī hī raushnī ke ziine se

haule haule zamīñ pe aa jaatā

phir zamīñ kī bahār meñ kho kar

kisī bachche ke saath mil jaatā

aur vo bachcha gale lagā ke mujhe

muskurā kar ḳhushī se ye kahtā

are tum to mire hī bhaa.ī ho

kis taraf kho ga.e the batlāo

kaash hotā maiñ ik shagufta gulāb

aur shāḳhoñ se uḌ ke thoḌī der

kisī muflis udaas maañ ke qarīb

us ke āñgan meñ jā ke ye kahtā

maañ baḌī der se udaas ho kyoñ

maiñ tumhāre hī dil kā TukḌā huuñ

mujh ko apne gale lagā lo zarā

aur mirī baat par vo muflis maañ

ġham-e-aulād bhuul kar mujh ko

chuum letī gale lagā letī

kash main ek bansuri hota

apne honTon pe le ke koi mujhe

mere dil ki chhupi hui aawaz

sari duniya mein muntashir karta

aur phir git mein badal jate

meri masum zindagi ke KHwab

kash hota main arsh ka mahtab

apni hi raushni ke zine se

haule haule zamin pe aa jata

phir zamin ki bahaar mein kho kar

kisi bachche ke sath mil jata

aur wo bachcha gale laga ke mujhe

muskura kar KHushi se ye kahta

are tum to mere hi bhai ho

kis taraf kho gae the batlao

kash hota main ek shagufta gulab

aur shaKHon se uD ke thoDi der

kisi muflis udas man ke qarib

us ke aangan mein ja ke ye kahta

man baDi der se udas ho kyon

main tumhaare hi dil ka TukDa hun

mujh ko apne gale laga lo zara

aur meri baat par wo muflis man

gham-e-aulad bhul kar mujh ko

chum leti gale laga leti