kash

maiñ shahr-e-tamannā kī tārāj nagrī ke malbe meñ

lāchār-o-tanhā

kabhī is khañDar par kabhī us khañDar tak

bhaTaktā huā

DhūñDtā phir rahā huuñ

apne ma.asūm mismār ḳhvāboñ kā malba

tabhī ik taraf ko nazar jo ga.ī to dikhā.ī diyā

TuuTe phūTe jalā.e ga.e kuchh makāñ

ek mīnār-e-masjid

kalash ek mandir kā auñdhā paḌā hai

kuredā to malbe ke nīche merā ḳhvāb

sāñjhī virāsat kā ek saaz bhī dafn thā

mujhe yaad aayā

mere ammāñ abbā ne is saaz par

kitne ulfat ke naġhme bajā kar sikhā.e the ham ko

javānī meñ

is saaz kī narm dilkash dhunoñ par

baḌe josh aur hausle se

tarāne mohabbat ke gaay the ham ne

magar phir

rūh-parvar azānoñ kī āvāz

aur mandiroñ ke bhajan

dilkashī bhuul kar

apne ġhalbe kā elaan bante ga.e

shor itnā baḌhā

sāz-e-ulfat kī āvāz bhī dab ga.ī

shor se josh baḌhtā gayā

hosh jaatā rahā

aur phir ye huā

aaj shahr-e-tamannā kī hālat hai jo

jis taraf dekhiye raakh hī raakh hai

aur maiñ

apnī mīrās ko

apnī sāñjhī virāsat ke TuuTe hue saaz ko

apne dil se lagā.e

dil-shikasta-o-giryāñ khaḌā huuñ

kyā karūñ

is ko malbe meñ hī dafn kar duuñ

mujh se ye to nahīñ hogā

aisā kartā huuñ TuuTe hue saaz ko

apnī aulād ko sauñp duuñ

bas isī aas par

isī ummīd meñ

mere bachche phir us saaz ko joḌ kar

giit ulfat ke phir gungunāne lageñ

nafratoñ ko miTāne lageñ

kaash ye ho sake

main shahr-e-tamanna ki taraj nagri ke malbe mein

lachaar-o-tanha

kabhi is khanDar par kabhi us khanDar tak

bhaTakta hua

DhunDta phir raha hun

apne masum mismar KHwabon ka malba

tabhi ek taraf ko nazar jo gai to dikhai diya

TuTe phuTe jalae gae kuchh makan

ek minar-e-masjid

kalash ek mandir ka aundha paDa hai

kureda to malbe ke niche mera KHwab

sanjhi wirasat ka ek saz bhi dafn tha

mujhe yaad aaya

mere amman abba ne is saz par

kitne ulfat ke naghme baja kar sikhae the hum ko

jawani mein

is saz ki narm dilkash dhunon par

baDe josh aur hausle se

tarane mohabbat ke gay the hum ne

magar phir

ruh-parwar azanon ki aawaz

aur mandiron ke bhajan

dilkashi bhul kar

apne ghalbe ka elan bante gae

shor itna baDha

saz-e-ulfat ki aawaz bhi dab gai

shor se josh baDhta gaya

hosh jata raha

aur phir ye hua

aaj shahr-e-tamanna ki haalat hai jo

jis taraf dekhiye rakh hi rakh hai

aur main

apni miras ko

apni sanjhi wirasat ke TuTe hue saz ko

apne dil se lagae

dil-shikasta-o-giryan khaDa hun

kya karun

is ko malbe mein hi dafn kar dun

mujh se ye to nahin hoga

aisa karta hun TuTe hue saz ko

apni aulad ko saunp dun

bas isi aas par

isi ummid mein

mere bachche phir us saz ko joD kar

git ulfat ke phir gungunane lagen

nafraton ko miTane lagen

kash ye ho sake