kawish

nayā din roz mujh ko kitnā pīchhe pheñk detā hai

ye aaj andāza hotā hai ki maiñ āhista āhista

hazāroñ miil kī duurī pe tum se aa gayā aur ab

dinoñ sāloñ mahīnoñ ko ikaTThā kar ke gum-gashta

dayār-e-hū meñ baiThā huuñ na kuchh aage na kuchh pīchhe

sivā kuchh vasvasoñ ke kuchh ḳhasāroñ ke kamar-basta

kahīñ chalne ko aage jis kā vāzeh kuchh tasavvur hī nahīñ koī

hamāre sab masā.il jin kā ham par bojh hai itnā

hamārī kisht-e-be-māya haiñ is sahrā meñ kyā boyā

bagūloñ ke sivā kuchh garm jhoñkoñ ke sivā ham ne

chalo ik tez dhāre meñ kahīñ par Daal deñ kashtī

latāfat ThanDe paanī kī kareñ mahsūs kuchh thoḌā bikhar jaa.eñ

hañseñ be-vaj.h yūñhī ġhul machā.eñ be-sabab dauḌeñ

uḌeñ un bādaloñ ke pīchhe aur mīloñ nikal jaa.eñ

naya din roz mujh ko kitna pichhe phenk deta hai

ye aaj andaza hota hai ki main aahista aahista

hazaron mil ki duri pe tum se aa gaya aur ab

dinon salon mahinon ko ikaTTha kar ke gum-gashta

dayar-e-hu mein baiTha hun na kuchh aage na kuchh pichhe

siwa kuchh waswason ke kuchh KHasaron ke kamar-basta

kahin chalne ko aage jis ka wazeh kuchh tasawwur hi nahin koi

hamare sab masail jin ka hum par bojh hai itna

hamari kisht-e-be-maya hain is sahra mein kya boya

bagulon ke siwa kuchh garm jhonkon ke siwa hum ne

chalo ek tez dhaare mein kahin par Dal den kashti

latafat ThanDe pani ki karen mahsus kuchh thoDa bikhar jaen

hansen be-wajh yunhi ghul machaen be-sabab dauDen

uDen un baadalon ke pichhe aur milon nikal jaen