kawish-e-nakaam

maiñ ne sochā thā ki ik roz bhulā dūñgā tujhe

apne ehsās se dhaḌkan se miTā dūñgā tujhe

ek bhūlā huā afsāna banā kar tujh ko

qabr meñ apne ḳhayāloñ kī dabā dūñgā tujhe

par ye merā hī ahd mujh se mukammal na huā

aur koshish mirī koshish ke sivā kuchh na rahī

dil kī ḳhvāhish ki ye maazī ko miTā Dālegā

ek nākām sī kāvish ke sivā kuchh na rahī

merī mahfil meñ bhī tū hai mirī ḳhalvat meñ bhī tū

merī sāñsoñ meñ bhī tū hai mirī hasrat meñ bhī tū

merī bechainī meñ tū hai mirī rāhat meñ bhī tū

mere andāz-e-junūñ meñ mirī vahshat meñ bhī tū

aaj bhī tū mirī rag rag meñ basā rahtā hai

tū hī shāmil hai masarrat meñ tabassum meñ mire

merī har raah kahīñ tujh se hī mil jaatī hai

terī bātoñ ke sivā kyā hai takallum meñ mire

maiñ ne ab chhoḌ diyā tujh ko bhulāne kā junūñ

aisī koshish nahīñ karnī jo mukammal hī na ho

zindagī jiinī hai ab is ke sahāre hī mujhe

chāhe vo tujh se milā pyaar kā ik pal hī na ho

main ne socha tha ki ek roz bhula dunga tujhe

apne ehsas se dhaDkan se miTa dunga tujhe

ek bhula hua afsana bana kar tujh ko

qabr mein apne KHayalon ki daba dunga tujhe

par ye mera hi ahd mujh se mukammal na hua

aur koshish meri koshish ke siwa kuchh na rahi

dil ki KHwahish ki ye mazi ko miTa Dalega

ek nakaam si kawish ke siwa kuchh na rahi

meri mahfil mein bhi tu hai meri KHalwat mein bhi tu

meri sanson mein bhi tu hai meri hasrat mein bhi tu

meri bechaini mein tu hai meri rahat mein bhi tu

mere andaz-e-junun mein meri wahshat mein bhi tu

aaj bhi tu meri rag rag mein basa rahta hai

tu hi shamil hai masarrat mein tabassum mein mere

meri har rah kahin tujh se hi mil jati hai

teri baaton ke siwa kya hai takallum mein mere

main ne ab chhoD diya tujh ko bhulane ka junun

aisi koshish nahin karni jo mukammal hi na ho

zindagi jini hai ab is ke sahaare hi mujhe

chahe wo tujh se mila pyar ka ek pal hi na ho